قلات میں سرکاری محکموں میں میرٹ کی پامالی کیخلاف جے یو آئی کی احتجاجی ریلی

کوئٹہ(قدرت روزنامہ)قلات میں میرٹ کی پامالی اور اقربا پروری کے خلاف جمعیت علماءاسلام کے رہنماءآغا حفظ الرحمان شاہ کی قیادت میں ریلی نکالی گئی . ریلی کے شرکاءنے پلے کارڈ اٹھا رکھے تھے جن پر میرٹ کی پامالی اور بدعنوانی کے نعرے درج تھے .

ریلی مختلف شاہراہوں سے ہوتی ہوئی ڈی ایچ او قلات آفس پہنچی اور ڈسٹرکٹ ہیلتھ آفیسر آفس کی تالہ بندی کردی . شرکاءنے میرٹ کی پامالی اقربا پروری اور پچاس فیصد پروموشن کوٹہ پر عمل نہ کرنے کے خلاف نعرہ بازی کی . آغا حفظ شاہ رحمن نے خطاب کرتے ہوئے کہا کہ قلات میں مختلف کیٹگریز کے پوسٹوں پر اقربا پروری کی حد کردی گئی ہے ڈی ایچ او نے میرٹ کی پامالی کرتے ہوئے اہل اور حقداروں کی تلفی کرکے بد عنوانی کے ذریعے من پسنداور عزیز و اقارب کو نوازا ہے ہم عوام کے حقوق کے حصول کے لئے کسی قربانی سے دریغ نہیں کریں گے . ہم سیکرٹری صحت، حکام بالا اور نیب سے مطالبہ کرتے ہیں قلات میں میرٹ کی پامالی اور اقربا پروری کا نوٹس لیتے ہوئے ڈی ایچ او کو انصاف کے کٹہرے میں کھڑا کرکے تمام تعیناتیاں منسوخ کرکے انصاف کے تقاضے پورے کئے جائیں . بصورت دیگر ہم اپنے آئندہ کا لائحہ عمل طے کرکے سخت سے سخت اقدام پر مجبور ہوں گے اور ڈی ایچ او آفس کی تالہ بندی جاری رکھیں گے . جس کی تمام تر ذمہ داری متعلقہ حکام پر عائد ہوگی . مظاہرین اپنے مطابات کے حق میں نعرہ بازی کرتے ہوئے پر امن طور پر منتشرہوگئے .