وزیراعظم شہبازشریف کی کراچی ایئرپورٹ کے قریب چینی باشندوں پر حملے کی شدید الفاظ میں مذمت

اسلام آباد(قدرت روزنامہ)وزیراعظم شہبازشریف نے کراچی ایئرپورٹ کے قریب چینی باشندوں پر حملے کی شدید الفاظ میں مذمت کی ہے .

سماجی رابطے کی ویب سائٹ ایکس پر اپنے پیغام میں وزیراعظم شہبازشریف نے کہاکہ کراچی میں گزشتہ رات ہونے والے المناک واقعہ پر گہرا دکھ ہوا، دھماکے کے نتیجے میں 2قیمتی چینی جانیں ضائع ہوئیں اور ایک شخص زخمی ہوا، اس گھناؤنے فعل کی شدید مذمت کرتا ہوں،چینی قیادت اور متاثرین کے اہلخانہ سے دلی تعزیت کرتا ہوں .

وزیراعظم شہبازشریف نے کہاکہ اندوہناک واقعہ کے مرتکب پاکستانی نہیں بلکہ پاکستان کے کھلے دشمن ہیں،ملزمان کی شناخت اور انہیں انصاف کے کٹہرے میں لانے کیلئے تحقیقات جاری ہیں،انہوں نے کہاکہ پاکستان اپنے چینی دوستوں کی حفاظت کیلئے پرعزم ہے،ہم اپنے چینی بھائیوں کی سلامتی اور بہبود کو یقینی بنانے میں کوئی کسر نہیں چھوڑیں گے .