اختیارات کے ناجائز استعمال کا الزام، احتساب کمیٹی نے سپیکر پختونخوا اسمبلی سے جواب طلب کرلیا

پشاور (قدرت روزنامہ )خیبرپختونخوا کی احتساب کمیٹی نے سپیکر خیبرپختونخوا اسمبلی کے خلاف شکایات پر جواب طلب کرلیا۔
نجی ٹی وی جیو نیوز نے ذرائع کے حوالے سے بتایا کہ احتساب کمیٹی کو سپیکر کے خلاف درخواست موصول ہوئی تھی جس میں سپیکرپراختیارات کے ناجائزاستعمال کی شکایات ہیں۔ذرائع نے بتایاکہ درخواست میں شکایت لگائی گئی کہ سپیکر نے غیر قانونی بھرتیاں بھی کیں اور سپیکر ہاوس کی تزئین و آرائش پر بلاضرورت کروڑوں روپے خرچ کئے۔ذرائع کا کہنا ہے کہ احتساب کمیٹی نے سپیکربابرسلیم سواتی سے 10 مارچ تک جواب طلب کرلیا۔
جیو نیوز سے گفتگو میں لیگل ایڈوائزرکے پی اسمبلی علی عظیم آفریدی ایڈووکیٹ کا کہنا تھاکہ احتساب کمیٹی سے سوالنامہ موصول ہوا ہے اور سپیکر کی جانب سے ایک ہفتے کے اندر جواب جمع کرنے کی ہدایت ملی ہے۔انہوں نے کہا کہ اسمبلی کی تزئین و آرائش کاکام سی این ڈبلیو کا ہے، سپیکرکا نہیں، اختیارات کے ناجائز استعمال کے الزامات بھی درست نہیں۔
خیال رہے کہ بانی پی ٹی آئی عمران خان نے خیبرپختونخوا میں مبینہ کرپشن اور وزرا کی کارکردگی پر احتساب کمیٹی کو مئی تک رپورٹ پیش کرنےکی ہدایت کی ہے۔
عمران خان کی ہدایت کے بعد پارٹی کی احتساب کمیٹی نے صوبائی کابینہ کے وزرا کو طلب کرنا شروع کردیا۔