آصف زرداری کا حکومت کی اہم ترین اتحادی جماعت سے پھر رابطہ ، آج عشائیے پر مدعو کرلیا، نجی ٹی وی کا دعویٰ

لاہور(قدرت روزنامہ) سابق صدر اور شریک چیئرمین پاکستان پیپلزپارٹی آصف علی زرداری نے حکومت کی اہم ترین اتحادی جماعت مسلم  لیگ (ق) سے ایک بار پھر رابطہ کیا اور آج چودھری برادران کو بلاول ہاؤس لاہور میں عشائیے پر مدعو کر لیا ہے .

نجی ٹی وی جیو نیوز نے ذرائع کے حوالے سے دعویٰ کیا کہ چودھری برادران سابق صدر سے آج بلاول ہاؤس لاہور میں ملاقات کریں گے ، مسلم لیگ (ق) کے وفد میں  وفاقی وزیر مونس الٰہی، ایم این اے سالک حسین ، ایم این اے حسین الٰہی اور طارق بشیر چیمہ  شامل ہوں گے  .

واضح رہے کہ مسلم لیگ (ق) کی قیادت سے سابق صدر آصف زرداری چودھری برادران کی رہائشگاہ پر ایک ملاقات چند روز قبل ہو چکی ہے جس میں آصف زرداری نے چودھری برادران  سے حکومت کے خلاف عدم اعتماد کی تحریک میں مدد مانگی تھی  ، اس ملاقات کے بعد اٹھنے والی افواہوں نے اس وقت دم توڑا جب  وفاقی وزیر مونس الٰہی ایک تقریب میں خطاب کرتے ہوئے کہا کہ ہماری روایت ہے گھر آنے والے مہمانوں کو گلے لگاتے  ہیں ، ان کے کھانے پینے کا خیال رکھتے ہیں ، ہم سیاسی لوگ ہیں ، سیاستدانوں سے میل ملاقات کرتے رہتے ہیں لیکن حکومت کو اس بارے میں گھبرانا نہیں چاہئے ، ہم حکومت کے ساتھ ہیں .