” کوئی خریدو فروخت نہیں ہورہی، اگر جلسے جلوسوں میں کوئی مر گیا تو سارے پچھتائیں گے” چوہدری شجاعت کا اہم ترین بیان آگیا

لاہور (قدرت روزنامہ) مسلم لیگ ق کے سربراہ چوہدری شجاعت حسین  نے تحریک عدم اعتماد میں ووٹوں کی خریداری کا تاثر مسترد کرتے ہوئے اپیل کی ہے کہ حکومت اور  اپوزیشن  اپنے جلسے جلوس ملتوی کردے  کیونکہ اگر اس میں کوئی مر گیا تو دونوں ہی پچھتائیں گے .

اپنے ایک  بیان میں چوہدری شجاعت حسین نے کہا کہ آج کل ٹی وی اور اخباروں میں آرہا ہے کہ  نوٹوں کی بوریاں کھل گئی ہیں، حتیٰ کہ وزیر اعظم نے بھی سندھ ہاؤس میں نوٹوں کی بوریاں کھلنے کا ذکر کیا، یہ عدم اعتماد کی پہلی تحریک ہے جس میں نہ کوئی ووٹ خرید رہا ہے اور نہ ہی کوئی ووٹ بیچ رہا ہے،  نوٹوں کی بوریاں کھلنے کا دعویٰ محض پراپیگنڈا ہے .

انہوں نے کہا وفاقی وزرا کہتے ہیں کہ 10 لاکھ لوگوں کے جلوس سے گزر کر عمران خان کے خلاف ووٹ ڈالنا ہوگا، اگر کوئی ووٹ ڈالنے کا فیصلہ کرلے تو 10 لاکھ تو کیا 10 کروڑ کا مجمع بھی اسے روک نہیں سکتا . حکومت تو جلسے جلوسوں کو روکنے کی کوشش کرتی ہے لیکن یہاں تو حکومت اور اپوزیشن ایک ہی ایشو پر جلسہ کر  رہے ہیں .   حکومتی اعلانات کو دیکھ کر ہی اپوزیشن کی جانب سے جلسوں کا اعلان کیا جا رہا ہے .

چوہدری شجاعت حسین کا کہنا تھا ایک بار پھر اپیل ہے کہ حکومت اور اپوزیشن دونوں ہی اپنے جلسے منسوخ کریں ، ان جلسے جلوسوں میں اگر کوئی مرگیا تو پھر سارے ہی پچھتائے ہیں .