بڑے میاں تو بڑے میاں پنجاب کے چھوٹے میاں سبحان اللہ، مرکز میں من پسند اپوزیشن لیڈر،پنجاب میں اپنی اسمبلی ہی بنا لی‘پرویزالٰہی برس پڑے

لاہور(قدرت روزنامہ) سپیکر پنجاب اسمبلی چودھری پرویزالٰہی سے پنجاب اسمبلی میں اپوزیشن لیڈر سبطین خان اور پارلیمانی لیڈر میاں محمود الرشید نے ملاقات کی . ملاقات میں ڈپٹی اپوزیشن لیڈرز راجہ بشارت، میاں اسلم اقبال، ارکان پنجاب اسمبلی راجہ یاسر ہمایوں، چودھری ظہیر الدین اور محسن لغاری بھی شریک تھے .

چودھری پرویزالٰہی نے کہا کہ پٹرولیم مصنوعات کی قیمتوں میں اضافہ ظالمانہ ہے، حکومت بجٹ میں تو ریلیف دے نہ سکی اب ہر ہفتے عوام پر مہنگائی کا بم گرایا جا رہا ہے، نام نہاد تجربہ کار ٹیم اپنے تجربے کے ساتھ ملکی معیشت اور عوام کی زندگی کو تباہ کر رہی ہے . انہوں نے کہا کہ مرکز میں بڑے میاں اور پنجاب میں چھوٹے میاں آئینی اداروں کا تقدس پامال کر رہے ہیں، بڑے میاں تو بڑے میاں ، پنجاب کے چھوٹے میان سبحان اللہ، وفاق میں من پسند اپوزیشن لیڈر بنا لیا تو پنجاب میں چھوٹے میاں نے اپنی اسمبلی ہی بنا لی .