کراچی(قدرت روزنامہ)عدالت نے دعا زہرامبینہ اغوا کے کیس میں تفتیشی افسر کو مزید تحقیقات کے بعد ضمنی چالان پیش کرنے کا حکم دے دیا . جوڈیشل مجسٹریٹ شرقی نے سی کلاس چالان پرتحریری فیصلہ جاری کردیا .
پولیس نے سی کلاس چالان کے ساتھ گواہوں،
ظہیرکے بیانات اوردعا کا ہائی کورٹ میں دیا گیا بیان پیش کیا . مدعی کے وکیل کے مطابق پولیس چالان عمر کے تعین کے رپورٹ پر مبنی ہے . عدالت نے تحریری فیصلے میں کہا کہ مدعی کے وکیل نے دعا کے عمرکے تعین کی میڈیکل رپورٹ کے خلاف سیکریٹری صحت کو درخواست دی ہے . مدعی کے وکیل نے دلائل دیے کہ نادرا ریکارڈ میں دعا کی عمر14 سال سے کم ہے، عمر کے تعین کی رپورٹ جھوٹی ہے . تحریری فیصلے میں کہا گیا کہ مقدمہ کی مزید تفتیش پرسرکاری وکیل کا کوئی اعتراض سامنے نہیں آیا . یہ امراب بھی قابل تفتیش ہے کہ دعا کے گھر چھوڑتے وقت عمر کیا تھی . عدالت نے تحریری فیصلے میں یہ بھی کہا کہ اپنی مرضی سے گھرچھوڑنے کے لیے مناسب عمرہونا ضروری ہے . حقائق کو مدنظررکھتے ہوئے مدعی مقدمہ کی مزید تحقیقات کی استدعا منظورکی جاتی ہے . عدالت نے محکمہ صحت کو مدعی کی درخواست 7 روز میں نمٹانے کا حکم دیتے ہوئے کہا کہ اگرمیڈیکل بورڈ بنایا جائے توعدالت کو بھی فیصلے سے آگاہ کیا جائے . عدالت نے تفتیشی افسرکو مزید تحقیقات مکمل کرنے کے بعد ضمنی چالان پیش کرنے کا حکم بھی دیا .
. .