اسپغول کھانے کے حیرت انگیز فائدہ
یہ انسانی جسم میں موجود خون سے اضافی اور منفی کولیسٹرول کے خاتمے کا سبب بنتا ہے جس کے نتیجے میں دل کے امراض سے بچاؤ ممکن ہوتا ہے، ایکنی ، کیل اور مہاسوں جیسی شکایات دور ہوتی ہیں، معدے اور آنتوں کی صفائی اور کارکردگی بہتر ہوتی ہے، بے وقت بھوک کا احساس کم ہوتا ہے اور وزن میں کمی آتی ہے . غذائی ماہرین کے مطابق اسپغول کی ایک چمچ مقدار میں 35 کیلوریز پائی جاتی ہیں جبکہ 1 فیصد فیٹ، 1 فیصد سیچوریٹڈ فیٹ، 189 ملی گرام پوٹاشیم، 27 فیصد ڈائیٹری فائبر 1 گرام شوگر ، 2.5 گرام پروٹین اور 3.4 فیصد آئرن پایا جاتا ہے جبکہ سو گرام اسپغول 71 گرام فائبر فراہم کرتا ہے . غذائی ماہرین کے مطابق اسپغول ایک بیج ہے جس کا چھلکا بطور فائبر استعمال کیا جاتا ہے، اس کی تاثیر سرد ہوتی ہے اور اسپغول کے چھلکے کو سبوس اسپغول بھی کہا جاتا ہے . ماہرین کا کہنا ہے کہ اسپغول کے بیجوں میں فیٹس یعنی روغن پایا جاتا ہے جبکہ اس کے چھلکے فیٹس سے پاک ہوتے ہیں، اسے بگھونے کے نتیجے میں یہ فالودہ نما جیلی کی شکل اختیار کر لیتا ہے جو انسانی جسم میں بیماریوں کے خلاف مؤثر کردار ادا کرتا ہے . آج کل نوجوانوں میں تیزی سے پھیلتی بیماری موٹاپا ہر کسی کا درد سر بنا ہوا ہے، موٹاپے کی بڑی وجہ باہر کی غذائیں، فاسٹ فوڈ، کولا ڈرنکس اور مرغن غذائیں بن رہی ہیں، اول تو یہ غذائیں کھانی نہیں چاہئیں . ماہرین کے مطابق اگر آپ نے کسی دن کوئی مرغن غذا کھا لی ہے تو اب اس کے آدھے گھنٹے بعد اسپغول کو بھگوئے بغیر دھیان سے ایک چمچ مقدار کے برابر منہ میں رکھیں اور اوپر سے آہستہ آہستہ کر کے دو گلاس پانی پی لیں . اس عمل سے آپ کا معدہ فاسٹ فوڈ میں موجود اضافی کیلوریز اور کولیسٹرول کو ہضم کرنے کے بجائے اسے باہر خارج کر دے گا جس کے نتیجے میں وزن میں کمی کے خواہشمند افراد موٹاپے سے بچ سکتے ہیں . خون میں کولیسٹرول کی مقدار کم کرنے کے لئے اسپغول کے اثرات سائنس سمیت ماہرینِ جڑی بوٹی بھی تسلیم کرتے ہیں، تحقیق سے ثابت ہوا ہے کہ اسپغول انسانی جسم میں برے کولیسٹرول کی سطح کم کرنے میں بھی مفید ہے . اس کے علاوہ اسپغول کے ذریعے صحت مند انداز میں وزن کم کیا جاسکتاہے جبکہ اسپغول پانی کی کمی بھی دور کرتا ہے . اسپغول پانی میں ملا کر پینے سے عمل انہضام کی نالی کے ذریعے فُضلے کو با آسانی گزارنے میں مدد کرکے قبض سے بچاتا ہے، گیس اور بدہضمی میں مفید ثابت ہوتا ہے . اس کے علاوہ اعلیٰ ریشے دار غذا جیسے اسپغول بڑی آنت کے کینسر کے خلاف مؤثر ہے اور آنت کے کینسر سے بچاؤ ممکن بناتا ہے یہ خون میں شوگر کی سطح اور انسولین میں باقاعدگی رکھ کر کولیسٹرول کی سطح کو بہتر بناتا ہے اور ذیابیطس کے مرض کے خطرے سے بچاتا ہے . اس کے استعمال سے دل کی بیماریوں سے بچا جا سکتا ہے، یہ شریانوں کے اندر جمی چکنائی کو دور کرکے منفی کولیسٹرول کو کم کرتا ہے . ہائی بلڈ پریشر میں روزانہ 12 گرام اسپغول کا استعمال بلڈ پریشر کو کم کرسکتا ہے . اسپغول ہارمونل عدم توازن کا شکار خواتین کے لئے بھی مفید ہے، اس کا استعمال جسم میں ایسٹروجن کی پیداوار میں اضافہ اور ہارمونل عدم توازن کو کنٹرول کرنے میں مدد کرتا ہے . اسپغول کے ساتھ کوئی دوا استعمال نہ کریں، اگر آپ کوئی دوا لیتے ہیں تو اسپغول سے ایک گھنٹہ پہلے یا دو گھنٹے بعد دوا کا استعمال کریں . ادویات کے ساتھ اسپغول کے استعمال سے مضر صحت اثرات سامنے آ سکتے ہیں لہٰذا ڈاکٹر کے مشورے کے بغیر اسے استعمال نہ کریں . . .
