کراچی (قدرت روزنامہ)محکمۂ موسمیات کی جانب سے کراچی میں 24 اور 25 اگست کے دوران کہیں ہلکی اور کہیں تیز بارش کی پیشگوئی کی گئی ہے . محکمۂ موسمیات کا کہنا ہے کہ ہوا کا شدید کم دباؤ آج سے سندھ پر اثر انداز ہو سکتا ہے، جس کے تحت کراچی میں آئندہ 2 روز میں بارش ہو سکتی ہے .
سردار سرفراز نے کیا بتایا؟
چیف میٹرولوجسٹ سردار سرفراز کے مطابق کراچی میں 24 اگست اور 25 اگست کو کہیں معتدل اور کہیں تیز بارش ہو سکتی ہے .
انہوں نے بتایا کہ مون سون سسٹم مشرقی راجستھان پر موجود ہے، اس سسٹم کے زیرِ اثر مشرقی سندھ میں آج بارش ہو سکتی ہے . چیف میٹرولوجسٹ سردار سرفراز نے یہ بھی بتایا ہے کہ مون سون کے اس سسٹم کے زیرِ اثر سندھ کے بیشتر مقامات پر بارش کا امکان ہے .
کراچی کا موسم آج کیسا ہے؟
محکمۂ موسمیات کے مطابق شہرِ قائد میں آئندہ 24 گھنٹوں کے دوران مطلع ابر آلود رہنے، بوندا باندی اور ہلکی بارش کا امکان ہے . کراچی میں کم سے کم درجۂ حرارت 27 ڈگری سینٹی گریڈ ریکارڈ کیا گیا جبکہ زیادہ سے زیادہ درجۂ حرارت 30 سے 32 ڈگری سینٹی گریڈ ہونے کا امکان ہے .
محکمۂ موسمیات نے بتایا ہے کہ شہر میں صبح سویرے چلنے والی ہوا میں نمی کا تناسب 88 فیصد رہا ہے . محکمۂ موسمیات کا یہ بھی کہنا ہے کہ کراچی میں آج جنوب مغرب کی سمت سے چلنے والی ہواؤں کی رفتار 12 کلو میٹر فی گھنٹہ ریکارڈ کی گئی ہے .