خاتون جج کو دھمکی دینے کیخلاف عدالت کا نوٹس خوش آئند ہے، شیری رحمٰن
اسلام آباد (قدرت روزنامہ)پاکستان پیپلز پارٹی کی رہنما اور وفاقی وزیر شیری رحمٰن کا کہنا ہے کہ خاتون سیشن جج کو دھمکی دینے کے خلاف اسلام آباد ہائی کورٹ کا نوٹس خوش آئند ہے .
سماجی رابطے کی ویب سائٹ ٹوئٹر پر سلسلہ وار ٹوئٹس میں شیری رحمٰن نے کہا کہ ججز اور پولیس افسران کو دھمکیاں دینے کی روش قابل تشویش ہے، ان دھمکیوں کو سنجیدہ نہ لیا گیا تو یہ رواج بن جائے گا .
شیری رحمٰن کا کہنا ہے کہ انصاف اور قانون نافذ کرنے والوں کو ہر کوئی ڈرانے دھمکانے کی کوشش کرے گا .
عمران خان ساری عمر عدالتوں اور ادراوں کے لاڈلے رہے اس لئے اب خود کو قانون اور عدالتوں سے بالا سمجھتے ہیں . اپنے غلطی تسلیم کرنے بجائے تحریک انصاف کے رہنماء اب بھی ملک بند کرنے کی دھمکیاں دے رہے . یہ ملک جام کرنے کے منصوبا بھی بنا رہے اور گرفتاری کے ڈر سے چھپ بھی رہے . 3/3
— SenatorSherryRehman (@sherryrehman) August 23, 2022
انہوں نے کہا کہ شہید ذوالفقار علی بھٹو کا عدالتی قتل ہوا، شہید بی بی نے ساری زندگی عدالتوں کا سامنا کیا لیکن ججز کو دھمکیاں نہیں دیں . وفاقی وزیر کا کہنا ہے کہ پی ٹی آئی حکومت میں آصف زرداری کا مہینوں ریمانڈ دیا جاتا تھا، ہم نے کبھی کسی جج کو دھمکی نہیں دی .
ان کا مزید کہنا ہے کہ تحریک انصاف 2 دن کے ریمانڈ پر جج کو دھمکی دے رہی ہے، عمران خان ساری عمر عدالتوں اور اداروں کے لاڈلے رہے، وہ اب خود کو قانون اور عدالتوں سے بالا سمجھتے ہیں .
پی پی پی رہنما نے یہ بھی کہا کہ غلطی تسلیم کرنے کے بجائے پی ٹی آئی رہنما ملک بند کرنے کی دھمکیاں دے رہے ہیں، ملک جام کرنے کے منصوبے بھی بنا رہے ہیں اور گرفتاری کے ڈر سے چھپ رہے ہیں .
