لارڈز ٹیسٹ، ’’اجنبی‘‘ کرکٹر بھارتی ٹیم کا حصہ بن گیا
لندن (قدرت روزنامہ) لارڈز ٹیسٹ کے دوران ’’اجنبی‘‘ کرکٹر بھارتی ٹیم میں شامل ہوگیا۔ لارڈز ٹیسٹ کے تیسرے دن لنچ کے بعد ایک شخص بھارتی ٹیم جیسی شرٹ پہن کر میدان میں داخل ہوگیا تاہم سیکیورٹی اہلکاروں نے اسے پکڑ کر فیلڈ سے باہر نکال دیا۔ برطانوی شہری نے لنچ کے بعد گراؤنڈ میں داخل ہوکر بھارتی ٹیم کو جوائن کرلیا اور فیلڈ تبدیلی سے متعلق احکامات دینا شروع کردیے، مذکورہ شخص کی شرٹ پر ”جارو 69‘‘ درج تھا۔
اس صورتحال پر ٹی وی پر کمنٹری کرنے والے سابق انگلش کپتان مائیکل ایتھرٹن نے کہا کہ بھارتی کھلاڑیوں کے درمیان موجود یہ شخص ایسا ظاہر کررہا تھا کہ وہ بھی میچ کا حصہ ہے، بعدازاں اس شخص کو ٹی وی کیمروں نے سٹینڈ میں دکھایا تو بھارتی پیسر سراج بھی مسکراتے ہوئے دکھائی دیے۔
Fan fools security and invades the pitch pretending to be an Indian player at the #Lords cricket stadium#ENGvIND #INDvENG #INDvsENG #TeamIndia @BCCI @englandcricket @TheBarmyArmy @thebharatarmy pic.twitter.com/NhkFcJ4pZH
— HT City (@htcity) August 14, 2021
واضح رہے کہ دوسرے ٹیسٹ میچ کے تیسرے روز کھیل کے اختتام پر انگلینڈ کی ٹیم پہلی اننگز میں 391 رنز بناکر آؤٹ ہوگئی۔
انگلینڈ کو پہلی اننگز میں بھارت پر 27 رنز کی برتری حاصل ہے۔ تیسرے دن کا کھیل شروع ہوا تو انگلینڈ نے بہترین بلے بازی کا سلسلہ جاری رکھا۔کپتان جو روٹ نے بیئر سٹو کے ساتھ مل کر بہترین پارٹنر شپ قائم کی۔بیئر سٹو 57رنز بناکر محمد سراج کی گیند پر آؤٹ ہوئے۔بیئر سٹو کے بعد جوز بٹلر بیٹنگ کے لئے آئے وہ 23 رنز بناکر ایشانت شرما کی گیند پر آؤٹ ہوئے۔
وکٹ کے ایک طرف کھلاڑیوں کے آؤٹ ہونے کا سلسلہ جاری رہا تاہم دوسری جانب کپتان جو روٹ نے جم کر بھارتی باؤلرز کا سامنا کیا،جو روٹ 180رنز بناکر ناٹ آؤٹ رہے۔بھارت کی جانب سے محمد سراج نے چار، ایشانت شرما نے تین جبکہ محمد شامی نے دو کھلاڑیوں کو آؤٹ کیا۔ اس سے قبل بھارتی ٹیم اپنی پہلی اننگز میں 364 رنز بنا کر آؤٹ ہوئی تھی، واضح رہے کہ بھارت اور انگلینڈ کا پہلا ٹیسٹ میچ ڈرا ہوگیا تھا۔
