بلدیاتی الیکشن کے فیصلے کیخلاف پی ٹی آئی کی درخواست پرالیکشن کمیشن ودیگرکونوٹس

اسلام آباد (قدرت روزنامہ)عدالت نے بلدیاتی الیکشن کےفیصلے کیخلاف پی ٹی آئی کی درخواست پرالیکشن کمیشن ودیگرکونوٹس کردیے . تفصیلات کے مطابق سندھ ہائی کورٹ میں تحریک انصاف نے بلدیاتی الیکشن کے فیصلے کے خلاف تحریک انصاف کی درخواست کی سماعت ہوئی .

سندھ ہائی کورٹ نے الیکشن کمیشن، چیف سیکریٹری سندھ، سیکریٹری بلدیات اور دیگر کو نوٹس جاری کرتے ہوئے فریقین سے یکم ستمبر کو جواب طلب کرلیا . درخواست اراکین سندھ اسمبلی خرم شیرزمان اور راجہ اظہر کی جانب سے دائر کی گئی ہے .
وہاب بلوچ ایڈووکیٹ نے مؤقف پیش کیا کہ الیکشن کمیشن نے صرف ایک پارٹی کو سن کر کراچی، حیدر آباد اور سکھر ڈویژن میں بلدیاتی انتخابات ملتوی کردیے . الیکشن کمیشن نے کسی دوسری پارٹی کا مؤقف سننا بھی گوارہ نہیں کیا . وکیل درخواست گزارنے کہا کہ الیکشن کمیشن نے بلدیاتی انتخابات کا نیا شیڈول بھی جاری نہیں کیا، کراچی میں زیادہ بارش نہیں ہورہی . الیکشن کمیشن نے بلدیاتی الیکشن ملتوی کردیے .
تحریک انصاف کی جانب سے وکلا نے دائر درخواست میں مؤقف اپنایا کہ انتخابات سندھ حکومت، اس کی اتحادی جماعتوں کی خواہش پر ملتوی کیے گئے ہیں . انتخابات ملتوی کرکے عوام کو نمائندے منتخب کرنے سے روکا گیا . درخواست میں عدالت سے استدعا کی گئی کہ دوسرے مرحلے کے انتخابات فوری کروانے کا حکم دیا جائے .