فواد چوہدری کا حکومت سے آئی ایم ایف ڈیل کی تفصیلات سامنے لانے کا مطالبہ

اسلام اباد (قدرت روزنامہ)پاکستان تحریک انصاف کے رہنما فواد چوہدری نے حکومت سے آئی ایم ایف ڈیل کی تفصیلات سامنے لانے کا مطالبہ کر دیا۔انہوں نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ مہنگائی کی شرح 44 فیصد سے زیادہ ہو چکی ہے۔ بجلی اور تیل کی قیمت ادا کرنا مڈل کلاس کے لیے ناممکن ہو گیا ہے۔فواد چوہدری نے مطالبہ کیا کہ ان حالات میں حکومت کو آئی ایم ایف سے ہونے والی ڈیل پر مکمل وضاحت دینا ہو گی اور تمام شرائط کو سامنے لانا ہوگا۔
انہوں نے کہا کہ موجودہ حکومت میں شامل سیاستدانوں کی مالیاتی معاملات میں حیثیت متنازع ہے ان کی باتوں پر آنکھیں بند کر کے اعتبار نہیں کر سکتے۔
قبل ازیں وزیر خزانہ مفتاح اسماعیل نے آئی ایم ایف سے ڈیل کی کوشش کو ناکام بنانے کا الزام پاکستان تحریک انصاف پر لگا یا۔
مفتاح اسماعیل نے کہا ہے کہ ملک سیلاب میں ڈوبا ہوا ہے اور خیبرپختونخوا کے وزیر خزانہ آئی ایم ایف معاہدے کے خلاف خط لکھ رہے ہیں۔

انہوں نے کہا کہ توقع ہے کہ بین الاقوامی مالیاتی فنڈ (آئی ایم ایف) پیر کو ہونے والے بورڈ اجلاس کے بعد پاکستان کو قرض کی قسط جاری کرے گا۔ مفتاح اسماعیل نے کہا کہ خیبرپختونخوا کے وزیر خزانہ تیمور خان جھگڑا نے ایک خط لکھا جس میں کہا گیا ہے کہ کے پی کے حکومت آئی ایم ایف کی ضروریات پوری کرنے کے لیے وفاقی حکومت کے ساتھ تعاون نہیں کرے گی۔
وزیر خزانہ نے کہا کہ تیمور خان جھگڑا پیر کو ان سے ملنے اسلام آباد آئیں گے۔انہوں نے کہا کہ انہوں نے جمعہ کی شام تیمور خان جھگڑا سے فون پر بات کی۔ انہوں نے کہا کہ بڑی حیرت ہوئی کہ پورا ملک پانی میں ڈوبا ہوا ہے اور ہمارے کچھ نادان دوست اپنی سیاسی دکانداری چمکانے میں لگے ہوئے ہیں ،میں ہاتھ جوڑتا ہوں کہ خدا کے لئے اس وقت سیاست نہ کریں اور جو پاکستانی سیلاب سے متاثر ہوئے ہیں ان کی مدد کے لئے آ گے آ ئیں ۔ انہوں نے کہاکہ پی ٹی آئی اوچھے ہتھکنڈوں کے ذریعے ملکی معیشت دائو پرلگا رہی ہے۔