اسلام آباد (قدرت روزنامہ)اقتصادی رابطہ کمیٹی (ای سی سی) کی جانب سے سیلاب متاثرہ علاقوں میں اشیائے ضروریہ کی فراہمی کیلئے 54کروڑ روپے کی منظوری دے دی گئی ہے۔تفصیلات کے مطابق وزیر خزانہ مفتاح اسماعیل کی زیر صدارت ای سی سی کا اہم اجلاس آج منعقد ہوا جس دوران 4 نکاتی ایجنڈا منظوری کیلئے پیش کیا گیا۔
کابینہ کی اقتصادی رابطہ کمیٹی (ای سی سی) نے سیلاب سے متاثرہ علاقوں میں اشیائے ضروریہ کی فراہمی کو یقینی بنانے کے لیے یوٹیلیٹی اسٹورز کارپوریشن (یو ایس سی) کے لیے 540 ملین روپے کی منظوری دی ہے۔
ای سی سی نے پاسکو کی گندم کی تمام وصول کنندگان میں مقامی اور درآمد شدہ پچاس فیصد کے تناسب کے ساتھ فراہمی کی بھی اجازت دی۔ تاہم یو ایس سی کو 75 فیصد مقامی اور 25 فیصد درآمدی گندم فراہم کی جائے گی۔فورم نے نیشنل ڈیزاسٹر منیجمنٹ اتھارٹی کو پاکستان بھر میں آفات سے متاثرہ آبادی کی ریسکیو، ریلیف اور بحالی کے اخراجات کو پورا کرنے کے لیے تین ارب روپے کی منظوری دی۔
افغانستان میں تین پاکستانی اسپتالوں کے عملے کے اخراجات اور تنخواہوں کے لیے ایک ارب روپے سے زائد کی فنڈنگ کی منظوری بھی دی گئی۔ای سی سی نے ٹریڈنگ کارپوریشن آف پاکستان کو آئندہ ربیع سیزن کے لیے حکومت سے حکومتی بنیادوں پر 300,000 میٹرک ٹن یوریا درآمد کرنے کا عمل شروع کرنے کی اجازت دی۔
