نور مقدم قتل کیس ،عدالت نے تھراپی کلینک کے مالک سمیت 6ملزموں کا 14روزہ جوڈیشل ریمانڈ دیدیا

اسلام آباد (قدرت روزنامہ)نور مقدم قتل کیس میں ڈسٹرکٹ اینڈ سیشن جج نے تھراپی کلینک کے مالک سمیت چھ ملزموں کو چودہ روزہ جوڈیشل ریمانڈ پر جیل بھیج دیا۔ڈسٹرکٹ اینڈ سیشن جج ثاقب جواد کی عدالت میں نور مقدم قتل کیس کی سماعت ہوئی ، عدالت نے استفسار کیا کہ کیا تمام ملزموں کو عدالت کے سامنے پیش کر دیا گیا ہے ، وکیل ملزم نے عدالت کو بتایا کہ تمام ملزمون کو ضمنی بیان پر گرفتار کیا گیا ہے ، ضمنی بیان میں ڈاکٹر طاہر کا نام موجود نہیں لہٰذا میرے موکل کو کیس سے ڈسچارج کیا جائے ۔جج ثاقب جواد نے استفسار کیا کہ کیا مدعی کا بیان الگ سے قلمبند کیا گیا ہے ؟ ، سرکاری وکیل نے عدالت کو بتایا کہ ملزم ظاہر کے والد نے ڈاکٹر طاہر ظہور سے رابطہ کیا جو وقوعہ تھا وہ ڈاکٹر طاہر ظہور تک بھی پہنچایا گیا ہوگا ، وکیل ملزم نے کہا کہ اگر ہم حقائق چھپاتے تو ہمارا ایک بندہ زخمی کیوں ہوتا ، ڈاکٹر طاہر ظہور کا کردار ہو تو بھی قابل ضمانت جرم ہے ، انہیں جیل نہیں بھیجا جا سکتا۔عدالت نے تمام ملزموں کو 14روزہ جوڈیشل ریمانڈ پر بھیجتے ہوئے 30اگست کو دوبارہ پیش کرنے کا حکم دے دیا۔