گینگ آف تھری زرداری، نواز، فضل الیکشن نہیں روک سکتے، شیخ رشید

راولپنڈی(قدرت روزنامہ) عوامی مسلم لیگ کے سربراہ شیخ رشید احمد نے کہا ہے کہ گینگ آف تھری زرداری، نواز، فضل الرحمن الیکشن نہیں روک سکتے۔سماجی رابطے کی ویب سائٹ ٹوئٹر پر جاری بیان میں شیخ رشید احمد نے کہاکہ پی ڈی ایم کرپشن بچا کے بعد سیاست بچا مہم پر ہے، 6 ماہ میں معیشت نہیں سدھری، برآمدات نہیں بڑھیں، مہنگائی اور ڈالر نہیں رکا۔
سابق وزیر داخلہ نے حکومتی پالیسیوں پر تنقید کرتے ہوئے کہا کہ اقتصادی صورت حال نازک ہو گئی ہے۔
مزید ڈیڑھ کروڑ لوگ خط غربت سے نیچے چلے گئے۔ باہر سے کوئی امداد آئی، نہ انہیں اندر سے مدد ملی۔ انہوں نے کہا کہ گینگ آف تھری زرداری، نواز اور فضل الرحمن انتخابات نہیں روک سکتے۔ شیخ رشید نے کہا کہ ہمارے دور میں ایم کیو ایم کو کوئی لاش نہیں ملی، 2 وزارتیں ہم نے دیں، 2 انہوں نے دیں،ساتھ ان کو کراچی سے فارغ کردیا۔ انہوں نے کہا کہ آصف زرداری بے شک لاہور بیٹھیں، الٹی گنتی شروع ہو چکی ہے۔ عمران خان اگلی انتخاب مہم سندھ سے شروع کرے گا۔شیخ رشید نے کہا کہ سمرقند میں بلاول کا چہرہ پڑھا جا سکتا ہے،پنجاب کی حکومت گرانے والے مرکز کی فکر کریں،آٹا اور پٹرول نایاب ہے۔