صدر مملکت کا عید میلاد النبیﷺ کے موقع پر قیدیوں کی سزاؤں میں کمی کا اعلان

اسلام آباد(قدرت روزنامہ) صدر مملکت کی جانب عید میلاد النبیﷺ کے موقع پر قیدیوں کی سزاؤں میں کمی کا اعلان کیا گیا ہے۔تفصیلات کے مطابق صدر مملکت ڈاکٹر عارف علوی نے عید میلاد النبی ﷺ کے موقع پر قیدیوں کی سزاؤں میں 90 روز کی کمی کی منظوری دے دی ہے۔ سزاؤں میں کمی کا اطلاق زنا، چوری، ڈکیتی، اغواء، مالی جرائم، دہشت گردی میں سزا یافتہ مجرموں اور قومی خزانے کو نقصان پہنچانے والے مجرموں پر نہیں ہوگا۔
اس کے علاوہ سزاؤں میں کمی کا اطلاق قتل، جاسوسی اور ریاست مخالف سرگرمیوں میں ملوث قیدیوں پر بھی نہیں ہوگا۔65 سال سے زائد عمر کے مرد قیدی جو اپنی ایک تہائی قید کاٹ چکے ہیں ان پر اطلاق ہوگا جبکہ 60 سال سے زائد عمر کی خواتین قیدی جو ایک تہائی قید کاٹ چکی ہیں ان پر بھی سزا میں کمی کا اطلاق ہوگا۔