برطانوی عوام الیکٹرک کمبل اور موم بتیاں کیوں ذخیرہ کررہے ہیں؟کون سا بحران آنےوالاہے؟
لندن(قدرت روزنامہ)موسم سرما کے شروع ہونے سے قبل برطانوی شہری توانائی بچانے کیلئے الیکٹرک کمبلوں، موم بتیوں اور سلو کوکرز ذخیرہ کرنے کو ترجیح دے رہے ہیں۔برطانیہ میں اشیائے خوردونوش کی بڑھتی ہوئی قیمتیں روزمرہ کے اخراجات میں اضافہ کرتی ہیں جس سے ماہانہ بجٹ بری طرح متاثر ہورہا ہے۔روس یوکرین جنگ کے باعث توانائی کی قیمتوں میں اضافے سے برطانیہ میں لاکھوں خاندانوں کو موسم سرما میں توانائی کے ممکنہ سخت بحران کا سامنا ہے۔محتاط اندازے کے مطابق برطانیہ کی دو تہائی آبادی جو تقریباً ساڑھے چار کروڑ افراد بنتے ہیں اس ماہ گیس کا بل مشکل سے ہی ادا کر سکیں گے۔گزشتہ روز جاری ہونے والی مارکیٹ ریسرچ رپورٹ سے معلوم ہوا ہے کہ ماہ ستمبر میں اشیائے خوردونوش کی قیمتوں میں اضافے کے بعد مہنگائی کی شرح نے 13.9% کا ایک اور نیا ریکارڈ قائم کیا ہے۔،
توانائی کے بحران اور گیس کے بڑھتے ہوئے بل اور اشیائے خوردونوش کی قیمتوں میں ریکارڈ اضافے کے بعد لاکھوں لوگ آنے والی سخت سردیوں کے حالات سے نمٹنے کے لیے خود کو تیار کررہے ہیں۔اسی مقصد کے تحت لوگ نقد رقم بچانے کے لیے ان اشیاء میں سرمایہ کاری کررہے ہیں، ایک رپورٹ کے مطابق لوگوں کا یہ رجحان اس وقت سامنے آیا جب بینک آف انگلینڈ کو مالی استحکام برقرار رکھنے کے لیے سرکاری بانڈ مارکیٹ میں دوبارہ لانا پڑے۔بینک کے اس اقدام سے لیبر مارکیٹ پر برا اثر پڑا جس کے بعد ممکنہ طور پر مہنگائی میں اضافہ ہوا، معاشی ماہرین کے مطابق بڑھتے ہوئے اس معاشی طوفان کا مطلب یہ ہے کہ صارفین اپنے غیر ضروری اخراجات میں نمایاں کمی کر رہے ہیں، جس سے ایک بار پھر مہمان نوازی اور تفریحی کاروبار کی روانی کو خطرہ ہے۔
اس حوالے سے بارکلے کارڈ کے ڈائریکٹر ایسمے ہاروڈ نے کہا ہے کہ یہ بہت سے دوسرے شعبوں کے لیے ایک مشکل وقت ہے کیونکہ صارفین صرف ضروری اخراجات پر توجہ مرکوز کررہے ہیں۔جب کہ انہوں نے بتایا کہ حکومت اگلے چھ مہینوں میں رہائشی اور کاروباری مراکز کے لیے توانائی کے بلوں میں سبسڈی دینے کے لیے تقریباً 60 بلین پاؤنڈ ($66 بلین) خرچ کر رہی ہے۔برطانیہ میں بارکلے کارڈ کے تحت مختلف سروے کیے گئے جس میں 10 میں سے نو افراد نے کہا کہ وہ گھریلو توانائی کے بلوں کے بارے میں فکرمند ہیں۔
سروے رپورٹ کے مطابق کھانا پکانے کے آلات بشمول سلو کوکرز، ایئر فرائیرز اور سینڈوچ بنانے والے برقی آلات جو عام طور پر کم توانائی استعمال کرتے ہیں کی فروخت میں چار ہفتوں میں 53 فیصد اضافہ ہوا ہے۔ڈیویٹ اور الیکٹرک کمبل کی مانگ مہینے میں 8 فیصد زیادہ تھی، موم بتی کی فروخت میں 9 فیصد اضافہ ہوا، اس کے علاوہ گھر کو گرم رکھنے کے لیے زیادہ تھرمل انڈرویئر، دستانے اور ڈریسنگ گاؤن خرید رہے ہیں۔
