شاہین سے خود کو صرف بچانا نہیں بلکہ رنز بھی بنانا، گمبھیر کا بھارتی ٹیم کو مشورہ
دبئی (قدرت روزنامہ) قومی کرکٹ ٹیم کے فاسٹ بولر شاہین شاہ آفریدی بھارت کے سابق کرکٹرز کے اعصاب پر بھی سوار ہوگئے . سابق بھارتی اوپنر گوتم گمبھیر اپنی ٹیم کو پاکستانی پیسر سے نمٹنے کے طریقے بتاتے ہوئے کہا کہ ٹی20 ورلڈکپ میں جب شاہین سے سامنا ہو تو صرف خود کو ہی نہیں بچانا بلکہ ان کے خلاف رنز بھی اسکور کرنے ہیں، جب آپ خود کو بچانے کی فکر میں پڑجاتے ہیں تو پھر سب کچھ محدود ہوجاتا ہے .
انہوں نے کہا کہ ٹی 20 کرکٹ میں آپ صرف خود کو بچانے پر ہی توجہ نہیں دے سکتے، میں جانتا ہوں کہ شاہین گیند کے ساتھ کافی خطرناک ثابت ہوسکتے ہیں مگر بھارتی بیٹرز کے لیے ضروری ہے کہ وہ ان کے خلاف رنز اسکور کریں .
دوسری جانب قومی کرکٹ ٹیم کے فاسٹ بولر شاہین شاہ آفریدی اپنا ری ہیب مکمل کرکے ہفتے کے روز برسبین پہنچیں گے جبکہ 17 اور 19 اکتوبر کو بالترتیب انگلینڈ اور افغانستان کے خلاف شیڈول وارم اپ میچز میں شرکت کے لیے اسکواڈ کا حصہ ہوں گے .
سری لنکا کے خلاف انجری کا شکار ہونے والے فاسٹ بولر شاہین آفریدی کا کہنا تھا کہ قومی اسکواڈ کو دوبارہ جوائن کرنے کے لیے بہت پرجوش ہوں، گزشتہ 10 روز سے روزانہ بغیر کسی درد کے تیز رفتاری سے 6 سے 8 اوورز پھینک رہا ہوں، ری ہیب کا یہ پروگرام بہت سخت اور مشکل تھا .
