کوئی قانون سے بالاتر نہیں، وزیراعظم شہباز شریف

Last Updated: October 21, 2022

اسلام آباد (قدرت روزنامہ)وزیراعظم شہباز شریف نے کہا ہے کہ آج کے فیصلے سے ثابت ہوگیا کہ کوئی بھی قانون سے بالاتر نہیں ہے۔سماجی رابطے کی ویب سائٹ پر اپنے ایک پیغام میں وزیراعظم شہباز شریف نے توشہ خانہ ریفرنس کے متعلق اپنے خیالات کا اظہار کیا ہے۔


وزیراعظم نے کہا کہ الیکشن کمشن نے توشہ خانہ ریفرنس میں انصاف کیا ہے اور قوم نے بھی دیکھ لیا کہ کرپٹ پریکٹس کرکے وزیراعظم کے منصب کو ذاتی آمدنی کا ذریعہ بنایاگیا۔انہوں نے کہا کہ آج صداقت و امانت کا بُت پاش پاش ہوگیا۔
وزیراعظم نے پاکستان تحریک انصاف کے کارکنان اور رہنماؤں کو مخاطب کرتے ہوئے کہا ہے کہ قانون سے لڑنے، گولیاں، ڈنڈے چلانے / فسادی جتھے لانے کے بجائے قانون کے سامنے سر جھکائیں کیونکہ کوئی بھی قانون سے بالاتر نہیں ہے۔اس سے قبل وفاقی وزیر خارجہ بلاول بھٹو نے بھی اپنے ایک پیغام میں الیکشن کمیشن کے فیصلے پر اپنے خیالات کا اظہار کیا ہے۔


بلاول بھٹو نے اپنے پیغام میں کہا کہ الیکشن کمیشن آف پاکستان نے عمران خان کو کرپٹ پریکٹسز کا مجرم قرار دیا ہےاب وہ نااہل ہے۔خیال رہے کہ الیکشن کمیشن آف پاکستان کی جانب سے توشہ خانہ ریفرنس میں عمران خان کو نااہل قرار دے دیا گیا ہے۔
الیکشن کمیشن نے عمران خان کو نا اہل قرار دیتے ہوئے الیکشن کمیشن نے عمران خان کی قومی اسمبلی کی رکنیت ختم کردی ہے۔فیصلے میں بتایا گیا ہے کہ عمران خان حالیہ ضمنی انتخابات میں جیتی 6 نشستوں پر بھی حلف نہیں اٹھا سکتے ہیں۔
الیکشن کمیشن نے بتایا کہ عمران خان نے الیکشن کمیشن میں غلط بیان حلفی جمع کرایا اور دانستہ طور پر الیکشن کمیشن سے غلط بیانی کی تاہم عمران خان کے خلاف کرپٹ پریکٹسز کی کارروائی شروع کرنے کا فیصلہ کیا ہے۔

Tags
Last Updated: October 21, 2022