وزیرِ اعلیٰ سندھ نے گھوٹکی واقعے کی تفصیلی رپورٹ طلب کر لی

کراچی (قدرت روزنامہ)وزیرِ اعلیٰ سندھ سید مراد علی شاہ نے گھوٹکی کی تحصیل اوباڑو کے کچے کے علاقے میں پیش آئے واقعے کی آئی جی پولیس سے تفصیلی رپورٹ طلب کر لی۔ترجمان وزیرِ اعلیٰ سندھ کا کہنا ہے کہ یہ واقعہ کس طرح پیش آیا؟ ہر پہلو سے متعلق رپورٹ دیں۔
ترجمان نے کہا کہ وزیرِ اعلیٰ سندھ نے ڈاکوؤں کے خلاف بھرپور آپریشن کی ہدایت دے دی ہے، مجھے پولیس اہلکاروں کے قاتل ہر صورت سلاخوں کے پیچھے چاہئیں۔وزیرِ اعلیٰ سندھ کا کہنا ہے کہ امن و امان کے قیام میں پولیس کی قربانیاں ناقابلِ فراموش ہیں، میں شہید پولیس افسران اور اہلکاروں کی جرأت کو سلام پیش کرتا ہوں۔
واضح رہے کہ سندھ کے ضلع گھوٹکی کی تحصیل اوباڑو کے کچے کے علاقے رونتی میں ڈاکوؤں کے پولیس پارٹی پر حملے میں ڈی ایس پی اور 2 ایس ایچ اوز سمیت شہید ہونے والے 5 اہلکاروں کی لاشیں ڈاکوؤں نے پولیس کے حوالے کر دی ہیں۔