سعودی عرب،مسجدِ نبوی کے صحن میں پیدا ہونے والی بچی کا نام طیبہ رکھ دیا گیا

مدینہ منورہ (قدرت روزنامہ) مسجد نبوی کے صحن میں پیدا ہونے والی بچی کا نام والدین نے طیبہ رکھ دیاہے . سعودی اخبار کے مطابق مدینہ منورہ میں میڈیا سے گفتگو کرتے ہوئے بچی کے والد ڈاکٹر طارق علی سلیمان نے بتایا کہ عشا کی نماز کے لیے مسجد نبوی میں اہلیہ اور بچوں کو چھوڑا تھا تاہم پارکنگ نہ ملنے پر گھر واپس چلا گیا،
نماز کے فوری بعد اہلیہ نے رابطہ کر کے ہسپتال جانے کے لیے کہا حالانکہ جس وقت اہلیہ کو بچوں کے ساتھ نماز کے لیے مسجد نبوی چھوڑا تھا تب طبیعت ٹھیک تھی اور ڈاکٹروں نے ولادت کا وقت کچھ دن بعد کا دیا تھا جو کچھ ہوا اچانک ہوا .

انہوں نے کہا کہ میں اہلیہ سے فون پر بات کر رہا تھا کہ اچانک ایک نرس نے مجھ سے رابطہ کیا اور خوشخبری سنائی کہ زچہ و بچہ دونوں خیریت سے ہیں .
بچی کی والدہ نے بتایا کہ اچانک طبیعت خراب ہونے پر مسجد سے نکلی اور جیسے ہی گیٹ نمبر 34 تک پہنچی تو گر گئی، وہاں ہلال احمر کا مرکز موجود ہے، عملے نے فوری طور پر طبی امداد دی اور بچی کی ولادت انجام پا گئی . انہوں نے کہا کہ مسجد نبوی کے صحن میں پیدا ہونے والی بچی کا نام طیبہ رکھ دیا گیا ہے .