اُروشی روٹیلا نے ریشبھ پنت کے معاملے پر خاموشی توڑ کر سب کچھ واضح کردیا

ممبئی(قدرت روزنامہ)بھارتی اداکارہ و رقاصہ اُروشی روٹیلا نے بھارتی کرکٹر ریشبھ پنت کے ساتھ تعلق جوڑنے کے معاملے پر اب مکمل طور پر خاموشی توڑ دی اور سب کچھ واضح کردیا۔بھارتی میڈیا کے مطابق گزشتہ کئی ماہ سے اُروشی روٹیلا کے مبینہ طور پر ریشبھ پنت کے ساتھ تعلقات کی خبریں سامنے آرہی تھیں جس پر کئی مرتبہ دونوں شخصیات نے گول مول بات بھی کی۔
بھارتی میڈیا سے خصوصی گفتگو کرتے ہوئے اُروشی روٹیلا نے اس سارے معاملے پر اپنی خاموشی توڑ کر واضح کردیا کہ آر پی (RP) میرا ساتھی اداکار ہے جس کا نام رام پوتھینینی ہے۔اُروشی روٹیلا نے کہا کہ میں جانتی نہیں تھی کہ ریشبھ پنت کو بھی آر پی (RP) کہا جاتا ہے۔انہوں نے کہا کہ جو کہا گیا اس میں آدھی چیزیں بھی سچ نہیں تھیں، لوگ بس چیزوں کو تصور کرتے ہیں اور اس کے بارے میں لکھ دیتے ہیں۔
بالی ووڈ کی 28 سالہ اداکارہ نے کہا کہ جو لوگ ایسی افواہوں پر یقین رکھتے ہیں، میں کہوں گی کہ انہیں تھوڑا سا چیزوں کو دیکھنے کی ضرورت ہے۔اُروشی روٹیلا نے کہا کہ جب آپ نے کچھ دیکھا ہی نہیں تو اگر کوئی اس معاملے میں کچھ کہہ رہا ہے تو آپ کیسے اس پر یقین کرسکتے ہیں؟۔
ایک سوال پر اداکارہ نے کہا کہ مجھے یہ چیز بہت پریشان کرتی ہے جب لوگ موازنہ کرتے ہیں کہ کرکٹرز کی اداکاروں سے زیادہ عزت ہوتی ہے اور کرکٹرز اداکاروں سے زیادہ پیسا کماتے ہیں۔اُروشی روٹیلانے کہا کہ میں جانتی ہوں کرکٹرز ملک کے لیے کھیلتے ہیں اور بڑی تعداد میں لوگ ان سے محبت اور عزت کرتے ہیں لیکن اداکاروں نے بھی بہت کچھ کیا ہے۔
اُروشی روٹیلا نے مزید کہا کہ اداکاروں نے بھی ملک کی نمائندگی کی، خود بھی کئی مرتبہ ایسا کرچکی ہوں اس لیے مجھے یہ احمقانہ موازنہ پسند نہیں ہے۔بھارتی میڈیا کے مطابق اداکارہ نے اُس ویڈیو سے متعلق بھی بات کی جس میں کئی لوگ اُروشی روٹیلا اور بھارتی کرکٹر ریشبھ پنت کا نام لے رہے تھے۔
اُروشی روٹیلانے کہا کہ جو کوئی بھی آپ کے ملک کی نمائندگی کرے اس کی عزت کرنی چاہیے، لوگ ان شخصیات کے ساتھ ایک چیز کی طرح کا سلوک نہیں کرسکتے، ان کے ساتھ گلی محلے کے لوگوں کی طرح سلوک نہیں کرسکتے۔
اداکارہ نے کہا کہ میں ایسی ویڈیوز کو ذاتی زندگی مں گھسنے کی کوشش سمجھتی ہوں اور اسے بالکل بھی پسند نہیں کرتی۔واضح رہے کہ اُروشی روٹیلا اور بھارتی کرکٹر ریشبھ پنت کے حوالے سے انٹرنیٹ پر میمز بھی بنائی گئی تھیں۔