وزیراعظم آفس کی شہباز شریف کے بھارت سے مذاکرات کے بیان کی وضاحت

اسلام آباد(قدرت روزنامہ) وزیراعظم آفس نے کہا ہے کہ 5 اگست 2019ء کا غیر قانونی اقدام واپس لیے بغیر بھارت سے مذاکرات ممکن نہیں اور وزیراعظم نے العربیہ ٹی وی چینل کو انٹرویو میں یہی موقف واضح کیا ہے . وزیراعظم آفس نے وزیراعظم محمد شہباز شریف کے العربیہ ٹی وی چینل کو دیے گئے انٹرویو کے حوالے سے واضح کیا ہے کہ وزیر اعظم نے مسلسل کہا ہے کہ پاکستان اور بھارت کو اپنے دوطرفہ مسائل بالخصوص جموں و کشمیر کا بنیادی مسئلہ بات چیت کے ذریعے حل کرنا چاہیے تاہم وزیر اعظم نے بارہا ریکارڈ پر کہا ہے کہ بات چیت تب ہی ہوسکتی ہے جب بھارت 5 اگست 2019ء کے اپنے غیر قانونی اقدام کو واپس لے .

ترجمان نے کہا ہے کہ بھارت کے اس اقدام کو منسوخ کیے بغیر مذاکرات ممکن نہیں، مسئلہ کشمیر کا حل اقوام متحدہ کی قراردادوں اور جموں و کشمیر کے عوام کی امنگوں کے مطابق ہونا چاہیے اور وزیراعظم نے اپنے حالیہ انٹرویو میں یہ موقف بالکل واضح کیا ہے .