عمران خان کے خواجہ آصف کیخلاف 10 ارب ہرجانہ کیس کی سماعت

اسلام آباد (قدرت روزنامہ)پاکستان تحریک انصاف (پی ٹی آئی) کے چیئرمین عمران خان کی جانب سے وزیر دفاع خواجہ آصف کے خلاف 10 ارب روپے ہرجانے کے کیس میں خواجہ آصف پیش نہیں ہوئے، عمران خان ویڈیو لنک کےذریعے عدالت میں پیش ہوئے۔ڈسٹرکٹ اینڈ سیشن کورٹ اسلام آباد میں خواجہ آصف اور عمران خان کے وکلاء بھی عدالت کے روبرو پیش ہوئے، کیس کی سماعت ایڈیشنل سیشن جج امید علی بلوچ نے کی۔
خواجہ آصف کے وکیل نے عمران خان سے ہاؤسنگ پروجیکٹ میں سرمایہ کاری پر سوالات کیے۔پی ٹی آئی چیئرمین عمران خان نے کہا کہ شوکت خانم کے بورڈ آف گورنرز کی جانب سے اس بارے میں بتایا گیا تھا، یاد نہیں ہاؤسنگ پراجیکٹ کا نام کیا تھا۔وکیل نے عمران خان سے سوال کیا کہ کیا آپ کو اسپتال کے بورڈ نے تحریری آگاہ کیا تھا؟ عمران خان نے جواب دیا کہ یاد نہیں بورڈ نے تحریری طور پر آگاہ کیا تھا یا نہیں۔
عمران خان نے کہا کہ بورڈ ممبر کی جانب سے 3 ملین ڈالرز واپس جمع کروانے کے بعد معاملہ ختم ہو گیا۔ جس پر خواجہ آصف کے وکیل نے کہا کہ معاملہ ختم نہیں ہوا، معاملہ تو وہیں سے شروع ہوتا ہے، 3 ملین ڈالر سرمایہ کاری کے وقت ریٹ 60 روپے تھا، واپس آئے تو 120 تھا۔
پی ٹی آئی چیئرمین عمران خان کے وکیل کی جانب سے سماعت ملتوی کرنے کی استدعا کی گئی، خواجہ آصف کے وکیل نے کہا کہ آئندہ سماعت پر 2 گھنٹے دے دیں، جرح مکمل کر لوں گا۔
عمران خان نے وکیل سے مکالمہ کرتے ہوئے کہا کہ اِدھر اُدھر کے سوال کی بجائے سچ پر آئیں تو معاملہ جلدی ختم ہو سکتا ہے۔عدالت نے کیس کی مزید سماعت ملتوی کردی گئی۔ پی ٹی آئی چیئرمین عمران خان پر جرح آئندہ سماعت پر بھی جاری رہے گی۔