صحافیوں کو ہراساں کرنے کا کیس, ڈی جی ایف آئی اے ، آئی جی اسلام آباد اور سپریم کورٹ کے تمام ایڈووکیٹ جنرلز طلب

اسلام آباد (قدرت روزنامہ)سپریم کورٹ نے صحافیوں کو ہراساں کرنے کے خلاف از خود نوٹس کیس میں ڈی جی ایف آئی اے ، آئی جی اسلام آباد اور سپریم کورٹ کے تمام ایڈووکیٹ جنرلز کو طلب کرلیا ۔ عدالت نے اسلام آباد ہائیکورٹ میں جاری کارروائی کی تفصیلات بھی طلب کر لیں ۔دوران سماعت جسٹس اعجاز الاحسن نے ریمارکس دیے کہ صحافیوں کے حقوق کے تحفظ کے لئے سپریم کورٹ مداخلت کرے گی ، آئین پاکستان میڈیا کو آزادی فراہم کرتا ہے ۔ جسٹس منیب اختر نے ریمارکس دیے کہ کوئی قانون آرٹیکل 19کے متصادم ہوا تو کالعدم قرار دے دیں گے ۔جسٹس قاضی امین نے ریمارکس میں کہا کہ بطور جج ہم سیاست نہیں کر سکتے ،صحافیوں کا کام بھی صحافت کرنا ہے ، سیاست کرنا نہیں ،ججز تاریخ کے ہاتھوں میں ہیں ، چند افراد کے نہیں ۔