کوئی ادارہ یا شخصیت الیکشن میں تاخیر کا باعث بنا تو اسے پھانسی تک لے جاؤں گا،علی امین گنڈا پور

ڈیرہ اسماعیل خان (قدرت روزنامہ) پاکستان تحریک انصاف کے رہنما علی امین گنڈا پور کا کہنا ہے کہ جو ادارہ یا شخصیت الیکشن میں ایک دن تاخیر کا باعث بنے گا . اسے پھانسی تک لے جاؤں گا .

جیو نیوز کے مطابق علی امین گنڈا پور نے ڈیرہ اسماعیل خان کے حلقہ این اے 38 میں انتخابی جلسے سے خطاب کرتے ہوئے کہا کہ استعفے کی بات کرنےو الے اسد محمود اب سامنے آئیں .
باپ بیٹا دونوں غائب ہیں، میرے مقابلے میں کوئی کاغذات نامزدگی جمع کرنے کو تیار نہیں . ( قومی اسمبلی کی 33 نشستوں پر ضمنی انتخابات کے سلسلے میں علی امین گنڈا پور نے حلقہ این اے 38 سے کاغذات نامزدگی جمع کرائے تھے) . کل تک ایک دوسرے کو گالیاں دینے والے آج ایک دوسرے کے ساتھ بیٹھے ہیں . انہوں نے کہا کہ میں نے کبھی شہباز شریف، آصف زرداری یا فضل الرحمان کی تعریف کی تو عوام مجھے جوتیاں مارے .
کبھی بھی وفاداری تبدیل کروں گا نہ ذاتی مفاد کے لیے ان لوگوں کے ساتھ بیٹھوں گا . علی امین گنڈا پور نے کہا کہ جو ادارہ یا شخصیت الیکشن میں ایک دن تاخیر کا باعث بنے گا . اسے پھانسی تک لے جاؤں گا . عمران خان کو نظام میں اصلاحات کا اختیار نہ ملا تو وہ بار بار اسمبلیاں توڑتا رہے گا . دوسری جانب انسداد دہشت گردی کی خصوصی عدالت نے پی ٹی آئی رہنما علی امین گنڈا پور کی 24 فروری تک عبوری ضمانت منظور کر لی .
جمعہ کو عدالت نے سماعت کے دوران پراسیکیوٹر کو نوٹس جاری کر تے ہوئے علی امین گنڈا پور کی عبوری ضمانت 1 لاکھ کے ضمانتی مچلکوں کو عوض منظور کرلی . علی امین کے وکیل نے استدعا کی کہ 1 لاکھ کے مچلکوں کو کم کر کےضمانتی مچلکے 10 ہزار کر دیں . عدالت نے حکم دیا کہ درخواست دے دیں پھر دیکھ لیں گے . علی امین گنڈا پور کے خلاف الیکشن کمیشن فیصلے کے خلاف احتجاج پر تھانہ آئی نائن میں مقدمہ درج ہے .