کراچی (قدرت روزنامہ)وزیرِ اطلاعات سندھ شرجیل انعام میمن کا کہنا ہے کہ ہم چاہتے ہیں کہ سب کو مردم شماری پر اعتماد ہو، سب کو اطمینان ہو کہ انہیں گنا گیا ہے، سندھ حکومت کے پاس بھی ڈیٹا ہو۔یہ بات انہوں نے کراچی میں پریس کانفرنس سے خطاب کے دوران کہی ہے۔شرجیل میمن کا کہنا ہے کہ ہر شخص کو گنا جائے گا، تاکہ معلوم ہو کہ کتنے وسائل استعمال ہو رہے ہیں، ان سارے فیصلوں کا مقصد عوام کو زیادہ سے زیادہ ریلیف دینا ہے۔
ان کا کہنا ہے کہ عمران خان کا ایجنڈا کسی پارٹی سے لڑنا نہیں ہے، بلکہ پاکستان کو نقصان پہنچانا ہے، ثابت کر سکتا ہوں کہ عمران خان یہ سب پاکستان کے خلاف کر رہے ہیں۔وزیرِ اطلاعات سندھ کا کہنا ہے کہ معیشت کو عمران خان نے نقصان پہنچایا ہے، انہوں نے آئی ایم ایف کے ساتھ ڈیل کی اور پھر اسے مسترد کیا۔
انہوں نے کہا کہ پیپلز پارٹی کے چیئرمین بلاول بھٹو زرداری نے کئی بار مردم شماری پر بات کی، دیکھ رہے ہیں کہ ہمارے خدشات پر بات ہوئی ہے کہ نہیں۔شرجیل میمن نے کہا کہ پوری دنیا میں مہنگائی ہے مگر پاکستان میں الگ صورتِ حال ہے، مہنگائی اور رمضان میں عوام کو ریلیف دینے پر بات ہوئی ہے، وزیرِ اعلیٰ سندھ مراد علی شاہ نے پہلے ہی غیر ضروری اخراجات کم کرنے کا اعلان کر رکھا ہے۔
ان کا مزید کہنا ہے کہ مختلف محکموں کو مجسٹریٹ کے اختیارات قانون اور ضرورت کے مطابق دیے جائیں گے، مجسٹریٹ کے اختیارات بیورو آف سپلائی کو دیے جائیں گے، مہنگائی کرنے والوں کے خلاف قانون کے مطابق کارروائی کی جائے گی۔وزیرِ اطلاعات سندھ شرجیل انعام میمن کا یہ بھی کہنا ہے کہ سارے فیصلوں کا مقصد عوام کو زیادہ سے زیادہ ریلیف دینا ہے، ریلیف کے لیے بچت بازار لگائے جائیں گے، پولیس کو جدید ہتھیار دینے کی منظوری دینے کا فیصلہ بھی کیا گیا ہے۔
