” اس میں کوئی فخر والی بات نہیں، میں اگر کام پر یا بیمار ہوں تو میرے شوہر ۔ ۔ ۔” اقراء عزیز کی پوسٹ پر شرمیلا فاروقی بھی خاموش نہ رہ سکیں، گھر کی بات بتادی
کراچی (قدرت روزنامہ) شوبز شخصیات اپنی گھریلو مصروفیات اور روز مرہ معاملات سمیت ہمسفر کے بارے میں بھی اکثر و بیشتر اپنے مداحوں کو آگاہ رکھتی ہیں ، ایسا ہی کچھ اقراء عزیز نے یاسر کے بارے میں بتایا تو پیپلزپارٹی کی رہنماء شرمیلا فاروقی بھی خاموش نہ رہ سکیں اور بتایا کہ اگر وہ کام پر یا بیمار ہوں توان کے شوہر بھی بیٹے کو نہلاتے، ڈائپر تبدیل کرواتے،کھانا کھلاتے اور سکول چھوڑنے تک جاتے ہیں اور انھیں یہ سب کرنا پسند ہے۔
واقعات کے مطابق حال ہی میں اقرا عزیز کی جانب سے سوشل میڈیا کے مقبول پلیٹ فارم انسٹاگرام پر یاسر حسین کی بیٹے کبیر کے ہمراہ ایک تصویر شیئر کی گئی تھی، شیئر کی گئی تصویر میں یاسر کو بیٹے کے کپڑے تبدیل کرواتے ہوئے دیکھا گیا تھا۔اداکارہ نے ساتھ لکھا کہ یاسر کا کام پر جانے سے قبل بیٹے کے کپڑے اور پیمپر تبدیل کرنے کا سیشن، یاسر نے پہلی مرتبہ کبیر کے کپڑےچینج کروائے جس پر مجھے فخر ہے، یاسر نے زچگی کے ہر لمحے میں میری بہت مدد کی، ڈائپر کی تبدیلی سے لے کر میرے آرام کے دوران کبیر کو سنبھالنے اور میرا ناشتہ بنانے تک۔
View this post on Instagram
اس پوسٹ پر رکن سندھ اسمبلی شرمیلا فاروقی نے اداکارہ کی رائے کی مخالفت کرتے ہوئے تبصرہ کیا کہ مجھےخوشی ہے کہ آپ کے شوہر یہ سب کر رہے ہیں لیکن اس میں فخر کرنے والی کوئی خاص بات نہیں، میں اگر کام پر یا بیمار ہوں تو میرے شوہر بھی بیٹے کو نہلاتے، ڈائپر تبدیل کرواتے،کھانا کھلاتے اور اسکول چھوڑنے تک جاتے ہیں اور انھیں یہ سب کرنا پسند ہے۔
جیونیوز کے مطابق شرمیلا فاروقی کی جانب سے بعد ازاں انسٹا سٹوری بھی شیئر کی گئی جس پر لکھا تھا کہ ماں کی طرح باپ بھی بچوں کی پرورش کے ذمہ دار ہوتے ہیں، مرد بیٹے کا ڈائپر اور کپڑے تبدیل کرواتے ہوئے خاص کیوں ہو جاتا ہے، والدین کو بچے کی ذمہ داریاں بانٹنے کی ضرورت ہے۔