ملک بھر میں انتخابات ایک وقت میں ہونے چاہئیں، سعید غنی

کراچی (قدرت روزنامہ)وزیر محنت سندھ سعید غنی نے کہا ہے کہ ملک بھر میں انتخابات ایک وقت میں ہونے چاہئیں، ایک ہی وقت پر انتخابات کے لیے کسی صوبے کا مؤقف رد نہیں ہونا چاہیے . کراچی میں پریس کانفرنس کرتے ہوئے سعید غنی نے کہا کہ آئین میں تمام اداروں کے اختیارات لکھے ہیں، مسائل تب ہوتے ہیں جب کوئی ادارہ اپنے دائرے سے نکلے، عدالت نے جو کردار ادا کرنے کی کوشش کی وہ سمجھ سے بالاتر ہے .

سعید غنی کا کہنا ہے کہ ایک جانب کہتے ہیں سیاسی جماعتیں بیٹھ کر باتیں کر لیں، دوسری جانب کہتے ہیں 90 دن میں الیکشن والا فیصلہ بھی قائم رہے گا . انہوں نے کہا کہ سپریم کورٹ آئین کے مطابق فیصلے کرے لیکن پنچایت قائم نہ کرے، اس وقت دو چھوٹے صوبے نہیں چاہتے کہ پنجاب میں الیکشن پہلے ہو، ایسا ہوا تو نیا ون یونٹ قائم کرنے کی کوشش ہو گی جو سندھ کے لیے قابل قبول نہیں .
صوبائی وزیر کا کہنا ہے کہ غیرمتنازع فیصلوں کے لیے غیرمتنازع ججز کو کیس سننا چاہیے، چیف جسٹس نے اسپیکر اسمبلی کو کہا ہے پارلیمنٹ اچھے قوانین بنائے . پیپلز پارٹی کے رہنما نے کہا کہ اگر واقعی ایسا کہا گیا ہے تو یہ مناسب بات نہیں ہے، کوئی عدالت کوئی پارلیمان کو ڈکٹیٹ نہیں کر سکتی .