کراچی(قدرت روزنامہ) سندھ اسمبلی نے مجرموں کی نگرانی کے لیے انہیں الیکٹرک کڑا پہنانے کا بل متفقہ طور پر منظور کرلیا . سندھ اسمبلی کا اجلاس اسپیکر آغا سراج درانی کی زیر صدارت شروع ہوا .
اجلاس کے دوران سندھ میں عادی مجرموں کی نگرانی کا قانون پیش کیا گیا جسے ایوان نے متفقہ طور پر منظور کرلیا .
مجوزہ قانون کے مطابق عادی مجرموں کو برقی کڑا لگایا جائے گا، چوری و ڈکیتی، اقدام قتل کے ملزمان، کار اور موٹر سائیکل چوری و چھیننے والے مجرموں پر الیکٹرک کڑا لگایا جاٸے گا ساتھ ہی منشیات سمیت عادی مجرمان کو بھی برقی کڑا لگایا جائے گا .
واضح رہے کہ گزشتہ برس دسمبر 2022ء میں قانون سے متعلق بل اسمبلی میں پیش کیا گیا تھا جسے آج منظور کیا گیا ہے .
سندھ ایکسپلوزیو بل بھی متفقہ طور پر منظور
دریں اثنا سندھ اسمبلی میں سندھ ایکسپلوزیو بل بھی متفقہ طور پر منظور کرلیا گیا . سندھ میں مائینز اور منرلز کی کھدائی کے دوران استعمال ہونے والے بارودی مواد کے لیے لائسنس جاری کیے جائیں گے .