’فنکاری‘ نے فنکاریاں دکھانا شروع کردیں، تنازع طول پکڑنے لگا

اسلام آباد (قدرت روزنامہ)پاکستان میوزک انڈسٹری کی معروف گلوکار کے گانے ’فنکاری‘ نے ریلیز ہوتے ہی فنکاریاں دکھانا شروع کردیں۔جہاں اس گانے نے ریلیز ہونے کے ساتھ ہی دھوم مچائی وہیں گلوکارہ کے اس دعوے کے بعد کہ گانا انہوں نے مرحوم شکیل سہیل کے ساتھ ملکر لکھا ہے، تنازع بھی کھڑا ہوا اور دیکھتے ہی دیکھتے طول پکڑنے لگا۔
پہلے معروف گلوکار و موسیقار شیراز اپل نے آئمہ بیگ کے دعوے کو غلط قرار دیا اور کہا کہ یہ گانا انہوں نے اکیلے لکھا ہے جس کا ثبوت میوزک ویڈیو کے اینڈ کریڈیٹس سے بھی ملتا ہے۔
تاہم اس تنازع نے اس وقت طول پکڑا جب گلوکارہ نے فوٹو اینڈ ویڈیو شیئرنگ پلیٹ فارم انسٹاگرام پر کسی کا نام لئے بغیر اسٹوری شیئر کی، جس میں انہوں نے لکھا کہ ’لگا لو ، لگا لو، فنکاریاں لگا لو اور تو کچھ ملنا نہیں ہے‘۔

آئمہ بیگ نے انسٹا اسٹوری شیئر کرنے کے چند ہی گھنٹوں بعد ڈیلیٹ کر دی تاہم یہ مختلف سوشل میڈیا پیجز پر وائرل ہوچکی تھی۔اسی حوالے سے ایک سوشل میڈیا پیج کی پوسٹ پر گلوکارہ نے کمینٹس میں تبصرہ دیتے ہوئے اپنے دعوے سے انکار کرتے ہوئے میڈیا پر الزام عائد کیا کہ انہوں نے ان کے بیان کو توڑ موڑ کے پیش کیا ہے۔

گلوکارہ کی جانب سے اس الزام کے بعد سوشل میڈیا انفلونسر مومن علی منشی بھی میدان میں آگئے اور آئمہ بیگ کو آڑے ہاتھوں لیتے ہوئے گلوکارہ کے الزام کی تردید کر دی اور کہا کہ آپ نے اپنے انٹرویو میں خود کہا ہے کہ آپ کو گانا بنانے میں 6 سال کا عرصۃ لگا جبکہ 3 سال قبل رمضان میں آپ نے مرحوم شکیل سہیل کے ساتھ ملکر گانا لکھا۔

مومن علی منشی نے یہ بھی لکھا کہ انہوں نے صرف گلوکارہ آئمہ بیگ اور گلوکار شیراز اُپل کے بیانات کا حوالہ دیا ہے کچھ بھی اپنی طرف سے نہیں لکھا۔ آپ بجائے اپنی غلطی تسلیم کرکے معافی مانگنے کے دیگر فنکاروں کی طرح ، روایت اختیار کرتے ہوئے میڈیا پر الزام لگا رہی ہیں‘۔