’یہ کون ہیں؟‘ سمیر وانکھیڑے کا شاہ رُخ خان، دپیکا پڈوکون اور میکا سنگھ کو پہچاننے سے انکار

ممبئی(قدرت روزنامہ)بالی ووڈ کنگ خان کے بیٹے، آریان خان ڈرگ اسکینڈل میں رشوت ستانی میں ملوث نارکوٹکس کنٹرول بیورو (این سی بی) کے سابق چیف سمیر وانکھیڑے نے دعویٰ کیا ہے کہ وہ شاہ رخ خان، دیپیکا پڈوکون اور میکا سنگھ کو نہیں جانتے . ملزم سمیر وانکھیڑے جو سپر اسٹار شاہ رخ خان کے بیٹے آریان خان ڈرگ اسکینڈل میں رشوت لینے کے الزامات کا سامنا کر رہے ہیں، اُنہوں نے بالی ووڈ کے کچھ مشہور ترین ناموں سے ناواقفیت ظاہر کی ہے .

بھارتی ویب سائٹ ’ ٹائمز آف انڈیا‘ کے مطابق سمیر وانکھیڑے کو ایک شو کے دوران شاہ رخ خان، دیپیکا پڈوکون اور میکا سنگھ کی تصاویر دکھائی گئیں جنہیں دیکھ کر این سی بی کے سابق چیف وانکھیڑے نے حیرانی سے جواب دیتے ہوئے کہا کہ اُنہیں نہیں معلوم کہ یہ لوگ کون ہیں .
شو ’کھپتےٹیتھے گپتے‘ میں بات چیت کے دوران سمیر وانکھیڑے کا خود سے متعلق کہنا تھا کہ وہ انصاف اور اصول پسند انسان ہیں . شو کے دوران انہوں نے ہوائی اڈے کی سیکیورٹی میں کام کرنے کے اپنے تجربے پر بات کرتے ہوئے انکشاف کیا کہ اُنہوں نے تقریباً 3500 کیسز کو ہینڈل کیا، ان کیسز میں سو سے پچاس میں مشہور شخصیات بھی شامل تھیں .
انہوں نے مشہور شخصیات کے پیچھے بھاگنے کے الزامات کی سختی سے تردید کرتے ہوئے کہا کہ میں قانون پر عمل کرنے والا آدمی ہوں . اس دوران وانکھیڑے نے مایوسی کا اظہار کرتے ہوئے کہا کہ مشہور شخصیات کے خلاف ان کے مقدمات اکثر اِن کے دوسرے مقدمات پر اثر انداز ہوتے ہیں .
سمیر وانکھیڑے نے انکشاف کیا کہ اُنہیں کام کے دوران کئی بار دھمکیاں بھی موصول ہوئی ہیں، دھمکیاں ملنا اُن کے لیے ایک عام سی بات ہے .
یاد رہے کہ نارکوٹکس کنٹرول بیورو (این سی بی) کے سابق چیف سمیر وانکھیڈے پر الزام ہے کہ انہوں نے بالی ووڈ کنگ خان کے بیٹے، آریان خان ڈرگ اسکینڈل میں شاہ رُخ خان سے رشوت کا مطالبہ کیا تھا . سمیر وانکھیڑے آج کل اپنے اوپر لگنے والے رشوت ستانی کے الزامات کا سامنا کر رہے ہیں .