یکم اکتوبر سے پیٹرول کی قیمت میں کمی آجائے گی، نگراں وزیر صنعت گوہر
کراچی (قدرت روزنامہ)نگراں وزیر صنعت گوہر اعجاز نے خوشخبری سناتے ہوئے کہا کہ یکم اکتوبر سے پیٹرول کی قیمت میں کمی آجائے گی۔
کراچی میں کاروباری برادری سے ملاقات کے بعد گورنر سندھ کامران ٹیسوری کے ہمراہ میڈیا سے گفتگو کرتے ہوئے گوہر اعجاز نے بتایا کہ ڈالر کی قیمت میں اضافے کی وجہ سے پیٹرول سمیت تمام اشیاء کی مہنگائی ہوئی ہے۔
نگراں وفاقی وزیر کامرس، انڈسٹریز اور ٹیکسٹائل ڈاکٹر گوہر اعجاز کی گورنر ہاؤس آمد، صنعتی پیداوار میں اضافہ،شہر قائد میں خصوصا صنعتوں کو بجلی اور گیس کی مسلسل فراہمی پر تبادلہ خیال،بجلی کی لوڈ شیڈنگ،اور نرخوں میں اضافہ سے عام شہری کے ساتھ ساتھ صنعت کار یکساں طور پر پریشان ہیں pic.twitter.com/vaSCUt9dA4
— Kamran Tessori (@KamranTessoriPk) September 23, 2023
گوہر اعجاز نے کہا کہ انٹربینک اور اوپن مارکیٹ میں ڈالر کی قدر کم ہوئی ہے، اقدامات کی وجہ سے کرنسی اپنی جگہ پر آگئی ہے، غیر قانونی طور پر باہر ڈالر بھیجنے والوں کو روکنے سے بہتری آئی ہے۔
انہوں نے کہا کہ ہماری ذمہ داری ہے صنعت اور تجارت کا خیال رکھیں، ڈالر کی قدر کم ہونے سے عوام کو ریلیف ملے گا، ڈالر کی قیمت بڑھنےکی وجہ سے مہنگائی بڑھی، یہ نہیں ہو سکتا کہ 17 ڈالر کی گیس خرید کر 4 ڈالر میں دیں۔نگراں وزیر صنعت نے کہا کہ اسپیشل انویسٹمنٹ فیسیلیٹیشن کونسل (ایس آئی ایف سی) میں سعودی عرب اور متحدہ عرب امارات (یو اے ای) سے بڑی سرمایہ کاری آ رہی ہے۔