کراچی میں اتارے گئے PIA کے طیارے میں کل بھی آتشزدگی کا سگنل ملا تھا
کراچی (قدرت روزنامہ)ہنگامی طور پر کراچی ایئر پورٹ پر اتارے گئے قومی ایئر لائن کے بوئنگ طیارے میں کل بھی آتش زدگی کا سگنل ملا تھا . ترجمان قومی ایئر لائن کے مطابق رجسٹریشن اے پی بی ایم ایس طیارے میں جدہ سے سیالکوٹ جاتے ہوئے کاک پٹ کیبن میں آتش زدگی کا سگنل ملا تھا جبکہ روانگی کے کچھ دیر بعد پرواز پی کے 746 کو جدہ واپس اتار لیا گیا تھا .
ترجمان قومی ایئر لائن کے مطابق فنی خرابی دور کر کے طیارے کو گزشتہ روز کراچی لایا گیا تھا جبکہ معائنے کے بعد طیارے کو سیالکوٹ روانہ کر دیا گیا تھا، یہی طیارہ آج سیالکوٹ سے جدہ کے لیے پرواز پی کے 745 کے لیے آپریٹ کیا گیا .
ایوی ایشن حکام کے مطابق پرواز پی کے 745 میں روانگی کے ڈیڑھ گھنٹے بعد فنی خرابی پیدا ہوئی جس کے بعد ایئر ٹریفک کنٹرولر کی ہدایت پر طیارے کو کراچی موڑ دیا گیا .
ذرائع کا کہنا ہے کہ آج بوئنگ طیارے کے بنکر میں آتشزدگی کا سگنل موصول ہوا تھا جس کے بعد بوئنگ 777 طیارے نے کراچی میں ٹیکنیکل لینڈنگ کی، مسافروں کو آف لوڈ کر دیا گیا ہے . ترجمان پی آئی اے کے مطابق طیارے میں آتش زدگی کے شواہد نہیں ملے، طیارے کو کلیئر کر دیا گیا ہے .
