عدالت کا بغیر ہیلمٹ موٹر سائیکل سواروں پر بھاری جرمانہ عائد کرنے کا حکم
لاہور (قدرت روزنامہ)لاہور ہائیکورٹ نے پنجاب بھر میں ہیلمٹ استعمال نہ کرنے والے موٹرسائیکل سواروں پر دو ہزار روپے جرمانہ عائد کرنے کا حکم دیدیا۔جسٹس شاہد کریم نے اسموگ کے تدارک کے لیے دائر درخواستوں کا تحریری حکم جاری کردیا، عدالت نے حکم دیا کہ ایل ڈی اے آئندہ کوئی پراجیکٹ عدالت کی اجازت کے بغیر شروع نہیں کرے گا۔
ایل ڈی اے ترقیاتی منصوبوں کے لیے محکمہ ماحولیات سے بھی ہدایات لے گا۔ عدالت نے تحریری حکمنامے میں گھروں میں گاڑیاں دھونے والوں،گرین بیلٹس پر پارکنگ پر 5،5 ہزار روپے جرمانے کا بھی حکم دیدیا ہے جبکہ متعلقہ حکام کو ہدایت کی ہے کہ شہر میں مزید ماواکی جنگل لگائے جائیں۔
پرانے درختوں کو محفوظ کرنے کے لیے اقدامات کیے جائیں۔ فیصلے کے مطابق کالا دھواں چھوڑنے والے بھٹوں کے خلاف متعلقہ افسران کاروائیاں کریں، بھٹوں کے خلاف کاروائیاں نہ کرنے والے افسران کے خلاف کارروائی کی جائے گی۔