9 مئی واقعات ، شرپسندوں کیخلاف کارروائی تیز کرنیکا فیصلہ ، چیئرمین پی ٹی آئی سے تفتیش کیلئے جزئیات طے
اسلام آباد (قدرت روزنامہ)9 مئی کے واقعات میں ملوث شرپسندوں کے خلاف کارروائی تیز کرنے کا فیصلہ کیا گیا ہے .
ذرائع کے مطابق پولیس کی خصوصی تفتیشی ٹیم نے مزید 124 ملزمان کی فہرستیں تیار کرکے متعلقہ تھانوں کے حوالے کر دیں .
گزشتہ 2 روز میں 9 مئی واقعات میں ملوث مزید 35 افراد کو حراست میں لیا گیا ہے .
ذرائع کا کہنا ہے کہ چیئرمین پی ٹی آئی سے تفتیش کیلئے پراسیکیوشن اور تفتیشی ٹیم نے جزئیات طے کر لیں . چیئرمین پی ٹی آئی سے تفتیش 9 مئی واقعات کی تحقیقات کی نگرانی آر پی او راولپنڈی کر رہے ہیں .
ذرائع نے بتایا کہ راولپنڈی میں 9 مئی کے واقعات پر مختلف تھانوں میں 19 مقدمات درج ہیں . جبکہ مجموعی طور پر 444 ملزمان کو گرفتار کرکے اڈیالہ جیل منتقل کیا گیا ہے،9 مئی کو جی ایچ کیو حملے میں اب تک 75 ملزمان کو گرفتار کیا گیا ہے .
