لاپتہ افراد کی بازیابی کیلیے بلوچستان نیشنل پارٹی کا پارلیمنٹ کے سامنے احتجاجی دھرنا

اسلام آباد(قدرت روزنامہ)بلوچستان نیشنل پارٹی ( بی این پی) نے لاپتہ افراد کی بازیابی کے لیے پارلیمنٹ ہاؤس کے سامنے دھرنا دیا .
بی این پی کے سربراہ اختر مینگل اور دیگر رہنماؤں نے بھی دھرنے میں شرکت کی .

مظاہرین نے جبری گمشدگیوں کیخلاف احتجاج کرتے ہوئے لاپتہ افراد کی بازیابی کا مطالبہ کیا .
بی این پی کے سربراہ سردار اختر مینگل نے کہا کہ اصل احتجاج پریس کلب کے سامنے تھا تاہم حکومت کو اچھا نہیں لگا اور ہمارے ساؤنڈ سسٹم اکھاڑ لیے گئے .
پاکستان پیپلز پارٹی کے سینیٹر سینیٹر رضا ربانی کا میڈیا سے گفتگو میں کہنا تھا کہ یہ آج کی بات نہیں سوچی سمجھی سازش کے تحت ہوتا آرہا ہے . ایک کمیٹی بنائی گئی جس نے رپورٹ پیش کی . اس کمیٹی کا میں بھی رکن تھا . مسنگ پرسنز نا بنائے جائیں اگر کسی نے کوئی جرم کیا ہے تو سامنے لایا جائے . مسنگ پرسنز کو سالوں غائب رکھنا اور پھر کہیں لاش ملنا افسوسناک ہے . اسکا حل ریاست کی سوچ میں تبدیلی ہے .
جماعت اسلامی کے سینیٹرمشتاق احمد کا اس موقع پر کہنا تھا کہ جماعت اسلامی کی جانب سے اختر مینگل سے اظہار یکجہتی کرنے آیا ہوں . پرامن آئینی اور قانونی جہدوجہد میں جماعت اسلامی ان کے ساتھ ہے . ہم نے سینٹ میں لاپتہ افراد کا معاملہ اٹھایا . جبری گمشدہ افراد کو بازیاب کرایا جائے .