افتخار الحسن گیلانی نےاستحکام پاکستان پارٹی میں شمولیت کا اعلان کردیا

اسلام آباد (قدرت روزنامہ)سابق ایم پی اے افتخار الحسن گیلانی نےاستحکام پاکستان پارٹی میں شمولیت اختیار کرلی ہے۔
تفصیلات کے مطابق سربراہ استحکام پاکستان پارٹی جہانگیر ترین اورعبدالعلیم خان اوچ شریف پہنچے جہاں انہوں نے سابق ایم پی اے مخدوم افتخار الحسن گیلانی سے ملاقات کی ۔
جہانگیر ترین اور عبدالعلیم خان نےافتخار الحسن گیلانی کی پارٹی میں شمولیت کا خیر مقدم کیا۔
سربراہ آئی پی پی جہانگیر ترین نے اس موقع پر کہا کہ عام انتخابات میں تمام پارٹیوں کو حصہ لینا چاہئے۔9مئی کا واقعہ انتہائی افسوسناک تھا ۔
انشاء اللہ اس ملک میں ایسا واقعہ کبھی رونما نہیں ہوگا، میں نے اور عبدالعلیم خان نے پی ٹی آئی کیلئے بہت محنت کی، ہمیں مایوسی کا سامنا کرنا پڑا اور ہم نے پی ٹی آئی سے علیحدگی اختیار کی۔
مجھے پانامہ کیسز میں ناجائز طور پر نااہل کیا گیا، اب 5 سال کی مدت کے باعث نواز شریف کیساتھ میری نااہلی بھی ختم ہوگئی ہے۔
اس موقع پر صدر آئی پی پی عبدالعلیم خان نے کہا اس وقت ملک کا سب سے بڑا مسئلہ معیشت ہے ، ملک میں معیشت کیلئے لانگ ٹرم پالیسی بنائی جائے۔
استحکام پاکستان کے پلیٹ فارم سے عوام کی خدمت کریں گے ، آنے والے دنوں میں مزید شخصیات کی شمولیت کے سرپرائز دیں گے ۔