بلوچستان اپنے قدرتی اور معدنی وسائل، طویل ساحلی پٹی اور جغرافیائی اہمیت کا حامل صوبہ ہے،گورنر بلوچستان ملک عبدالولی خان کاکڑ

کوئٹہ(قدرت روزنامہ)گورنر بلوچستان ملک عبدالولی خان کاکڑ نے کہا کہ بلوچستان میں بینکنگ سیکٹر معاشی سرگرمیوں کو فروغ دینے، عورتوں کی معاشی پوزیشن مستحکم بنانے، نوجوانوں کو جدید مہارتیں سکھانے اور آسان قسطوں پر قرضے فراہم کر کے چھوٹے کاروبار اور روزگار کے مواقع فراہم کرنے میں اہم کردار ادا کر سکتا ہے. انہوں نے توقع ظاہر کی کہ بینکنگ سیکٹر صوبے میں اپنی فعالیت بڑھانے اور دائرہ کار کو وسعت دینے کے ساتھ ساتھ صوبے میں سرمایہ کاری لانے میں فعال کردار ادا کریگا. ان خیالات کا اظہار انہوں گزشتہ روز گورنر ہاوس کوئٹہ میں بینک الفلاح کی ریٹیل بینکنگ گروپ ہیڈ مہرین احمد کی قیادت میں وفد سے گفتگو کرتے ہوئے کیا. اس موقع پر گورنر بلوچستان نے کہا کہ بلوچستان اپنے قدرتی اور معدنی وسائل، طویل ساحلی پٹی اور جغرافیائی اہمیت کا حامل صوبہ ہے آج دنیا کی نظریں بلوچستان پر لگی ہوئی ہے اور جاری ترقیاتی منصوبوں کے نتیجے میں توقع ہے کہ بلوچستان بہت جلد نمایاں عالمی تجارتی مرکز کے طور پر ابھرے گا. یہاں سرمایہ کاری کے دستیاب منافع بخش مواقعوں سے بھرپور سرزمین سے استفادہ کر کے تمام قومی اور بین الاقوامی سرمایہ کار اور مالیاتی ادارے خود اپنے لیے بہترین راہ نکال سکتے ہیں. انہوں نے کہا کہ آج کے عہد میں ہیومن رسورس کی ترقی کو عمومی ترقی کے عمل میں کلیدی حیثیت حاصل ہے لیکن بروقت توجہ نہ دینے کے باعث ہم انسانی وساتل کو ترقی دینے میں دوسرے صوبوں سے بہت پیچھے رہ گئے ہیں. مختلف ادارے اور خاص طور پر بینکنگ سیکٹر اس خلاء کو پُر کرنے اور انسانی وسائل کو وقت کے جدید تقاضوں کے مطابق ترقی دینے میں تعاون فراہم کر سکتا ہے. اس سلسلے میں نوجوانوں کو فنی اور تیکنیکی تربیت فراہم کرنے، عصر حاضر کے تقاضوں اور انسانی ضروریات کے مطابق تعلیم و تربیت فراہم کرنے اور انھیں چھوٹے کاروبار اور روزگار کی فراہمی کیلئے نتیجہ خیز اقدامات کئے جانے چاہیے.