کاجول بھی جعلی ویڈیو کا شکار

اسلام آباد (قدرت روزنامہ)بالی ووڈ کی اداکارہ رشمیکا منڈانا اور کترینہ کیف کے بعد اب اداکارہ کاجول بھی ڈیپ فیک ویڈیوز و تصاویر کا شکار ہو گئیں .
بھارتی میڈیا کی رپورٹس کے مطابق بھارتی اداکارہ کی متنازع ویڈیو سوشل میڈیا پر وائرل ہو گئی ہے .

بھارتی میڈیا کے مطابق سوشل میڈیا پر وائرل ہونے والی بھارتی اداکارہ کی جعلی ویڈیو درحقیقت سوشل میڈیا انفلوئنسر ’روزی برین‘ کی ہے، جس کی تصدیق روزی برین کی اصل ویڈیو منظرِ عام پر آنے کے بعد ہو گئی ہے .
میڈیا کی رپورٹس کے مطابق سوشل میڈیا انفلوئنسر نے مذکورہ ویڈیو 2 جون کو اپنے انسٹا گرام اکاؤنٹ پر شیئر کی تھی، انہوں نے مذکورہ ویڈیو ’گیٹ ریڈی ود می‘ کے مشہور سوشل میڈیا ٹرینڈ کے تحت بنائی تھی .
واضح رہے کہ رواں ماہ کے آغاز میں تیلگو، کناڈا، تامل اور ہندی فلموں کی معروف اداکارہ رشمیکا منڈانا کی ایک جعلی ویڈیو سوشل میڈیا پر جاری کی گئی تھی جس کی تحقیقات کا عمل شروع ہو چکا ہے .

بعد ازاں کترینہ کیف کی بھی ایک جعلی تصویر سامنے آئی تھی، جس میں حال ہی میں ریلیز ہونے والی ان کی فلم ’ٹائیگر 3‘ کے ایک منظر سے اداکارہ کی تصویر کو ڈیپ فیک تصویر میں تبدیل کیا گیا تھا .
سوشل میڈیا پر وائرل بھارتی اداکاراؤں کی متنازع و جعلی ویڈیوز و تصاویر نے جہاں ڈیپ فیک ٹیکنالوجی کے اخلاقی مضمرات کے حوالے سے خدشات کو جنم دیا ہے وہیں پوری بھارتی فلم انڈسٹری کو بھی تشویش میں مبتلا کر دیا ہے .