پاکستانی کارکنوں کو ملازمت دینے کے منتظر ہیں، سعودی کمپنی

اسلام آباد (قدرت روزنامہ)سعودی عرب میں میگا پاور اور تعمیراتی کمپنی الفنار کے سی ای او صباح المطلق نے کہا ہے کہ ہم اپنے آئندہ منصوبوں میں مزید پاکستانیوں کو ملازمت کی فراہمی کیلئے کوشاں ہیں۔
میڈیا رپورٹس کے مطابق نگراں وزیر اعظم کے معاون خصوصی برائے سمندر پار پاکستانیز و ترقی انسانی وسائل جواد سہراب ملک سے ملاقات میں صباح المطلق نے کہا کہ ہم پاکستانی افرادی قوت کے اعلی معیار اور سعودی معیشت میں ان کے تعاون سے بہت متاثر ہیں۔
وزارت سمندر پار پاکستانیز کی جانب سے جاری پریس ریلیز کے مطابق نگراں وزیر اعظم کے معاون خصوصی برائے سمندر پار پاکستانیز و ترقی انسانی وسائل جواد سہراب ملک کمپنی کے ہیڈ کوارٹر پہنچے تو ان کا پرتپاک استقبال کیا گیا۔
جواد سہراب ملک کا کہنا تھا کہ پاکستانی حکومت سعودی عرب کے ساتھ اقتصادی تعلقات کو مضبوط بنانے اور دونوں ممالک کے لیے باہمی طور پر فائدہ مند مواقع پیدا کرنے کے لیے پرعزم ہے۔
ان کا کہنا تھا کہ پاکستان کے پاس انجینئرنگ، آئی ٹی، ہیلتھ کیئر اور مہمان نوازی سمیت مختلف شعبوں میں ہنر مند اور تجربہ کار پیشہ ور افراد کی بڑی تعداد موجود ہے، مجھے یقین ہے کہ پاکستانی کارکن سعودی عرب کے وژن2030 کے ترقیاتی اہداف میں اہم کردار ادا کرسکتے ہیں۔
تعمیراتی کمپنی الفنار کے سی ای او صباح المطلق کا کہنا تھا کہ ہم پاکستانی افرادی قوت کے اعلی معیار اور سعودی معیشت میں ان کے تعاون سے بہت متاثر ہیں، ہم مستقبل کے منصوبوں کے لیے مزید پاکستانی کارکنوں کو ملازمت دینے کے منتظر ہیں۔