عمران خان اور بشریٰ بی بی سمیت 29 افراد کا نام ای سی ایل پر ڈالنے کی سفارش
اسلام آباد (قدرت روزنامہ)وفاقی کابینہ کی ذیلی کمیٹی برائے ای سی ایل نے چیئرمین پی ٹی آئی سمیت 29 افراد کا نام ای سی ایل پر ڈالنے اور 13مختلف نوعیت کے کیسز کو ای سی ایل سے نکالنے کی سفارش کردی ہے۔
وفاقی کابینہ کی ذیلی کمیٹی برائے ای سی ایل کا اجلاس ہوا، جس میں وزیر داخلہ اور وزیر مواصلات وریلویز شاہد اشرف تارڑ نے شرکت کی، جب کہ وزارت داخلہ اور دیگر اداروں کے افسران بھی اجلاس میں شریک ہوئے۔
اجلاس میں ای سی ایل سے متعلق مختلف نوعیت کے کیسز کا جائزہ لیا گیا اور ذیلی کمیٹی نے 41 افراد کے نام ای سی ایل میں ڈالنے کی سفارش کی۔
اجلاس میں نیب کی سفارش پر 190ملین پاؤنڈ اسکینڈل میں چیئرمین پی ٹی آئی اور بشری بی بی سمیت 29افراد کے نام ای سی ایل میں ڈالنے کی سفارش کردی، زلفی بخاری، شیخ رشید، غلام سرور خان، پرویز خٹک، پرویز الہی ، مراد سعید، حماد اظہر، عمرایوب اور علی امین گنڈاپور کے نام بھی ای سی ایل میں ڈالنے کی سفارش کی گئی ہے۔
اجلاس میں 13 مختلف نوعیت کے کیسز کو ای سی ایل سے نکالنے کی بھی سفارش کی گئی، کمیٹی نے عدلیہ کی ہدایات پر7 افراد کے نام ای سی ایل سے نکالنے، اور نظرثانی اپیلوں میں سے 3 افراد کے نام ای سی ایل سے نکالنے کی سفارش کی۔
ذیلی کمیٹی کی سفارشات حتمی منظوری کے لئے نگران وفاقی کابینہ کو ارسال کی جائیں گی۔