نوٹس کام کر گیا ، سیکرٹری خزانہ کی الیکشن کمیشن کو 2 روز میں فنڈز فراہم کرنیکی یقین دہانی
اسلام آباد (قدرت روزنامہ)سیکرٹری خزانہ نے الیکشن کمیشن کو دو دن میں مختص انتخابی فنڈز جاری کرنے کی یقین دہانی کرا دی ہے .
الیکشن کمیشن نے فروری 2024 میں ہونے والے عام انتخابات کے لیے مختص فنڈز ریلیز نہ ہونے کے معاملے کا نوٹس لیتے ہوئے سیکرٹری وزارت خزانہ کو طلب کیا تھا .
جس پر سیکرٹری وزارت خزانہ امداداللہ بوسال الیکشن کمیشن کے حکام سے ملاقات کے لیے پہنچے .
سیکرٹری خزانہ نے الیکشن کمیشن حکام سے ملاقات کے بعد میڈیا سے گفتگو کرتے ہوئے کہا کہ الیکشن کمیشن کی طرف سے 14 نومبر کو فنڈز کی فراہمی کیلئے خط لکھا گیا جو 18 نومبر کو وزارت خزانہ کو موصول ہوا .
انہوں نے کہا کہ فنڈز کے اجرا کے لیے مختلف سطح سے منظوری ضروری ہوتی ہے، الیکشن کمیشن کو جتنی ضرورت ہے ، اگلے دو دن میں مطلوبہ فنڈز جاری کر دیے جائیں گے .
