پی ٹی آئی کے پاس 70 فیصد عوام کی اکثریت ہے، چیئرمین تحریک انصاف

اسلام آباد (قدرت روزنامہ)چیئرمین پاکستان تحریک انصاف (پی ٹی آئی) بیرسٹر گوہر خان نے کہا ہے کہ جس طرح ہم نے الیکشن کروائے، 170 پارٹیوں نے نہیں کروائے۔
الیکشن کمیشن کے باہر میڈیا سے گفتگو کرتے ہوئے انہوں نے آئندہ عام انتخابات سے متعلق اظہار خیال کیا۔ انہوں نے کہا کہ الیکشن کمیشن سے درخواست ہے یہ عوام کے بنیادی حقوق کا مسئلہ ہے۔
بیرسٹر گوہر خان کا کہنا تھا کہ اس وقت پی ٹی آئی کے پاس 70 فیصد عوام کی اکثریت ہے۔ اگر بلے کا نشان چھیننے کی کوشش کی گئی تو یہ 70 فیصد عوام کے بنیادی حقوق کی خلاف ورزی ہوگی۔
اس موقع پر وکیل علی ظفر نے گفتگو کرتے ہوئے کہا کہ ہمیں لیول پلیئنگ فیلڈ نہیں مل رہی ہمارے لوگ گرفتار ہو رہے ہیں۔ الیکشن کمیشن ایک آئینی ادارہ ہے ہمیں اس پر یقین ہے، الیکشن کمیشن کا کام بس یہ دیکھنا ہے کہ الیکشن ہوئے یا نہیں ہوئے۔
انہوں نے کہا کہ ہم چاہیں گے کہ الیکشن کمیشن اپنی ذمے داری پوری کرے، یہ کہنا کہ ہمیں نہیں پتہ تھا کہ الیکشن ہوں گے یہ غلط ہے۔ درخواستیں مسترد کر دینی چاہیے تھیں لیکن الیکشن کمیشن نے نوٹسز جاری کر دیے۔
علی ظفر نے مزید کہا کہ ہم نے 2019 کے آئین کے تحت انتخابات کروائے ہیں، یہ الزام لگایا جا رہا ہے کہ بلامقابلہ کیسے منتخب ہو گئے۔ الیکشن ایکٹ 2017 میں بھی ایسی کوئی بات نہیں۔