بلاول، ذوالفقار علی بھٹو کی سزائے موت سے متعلق ریفرنس سے چاہتے کیا ہیں، سابق امریکی وزیر خارجہ کا اس سے کیا تعلق؟ پریس کانفرنس میں بتا دیا

اسلام آباد(قدرت روزنامہ) چیئرمین پیپلز پارٹی بلاول بھٹو زرداری نے کہا ہے کہ وہ چاہتے ہیں عوام کے سامنے یہ بات آئے کہ ذوالفقار علی بھٹو بے گناہ تھے، انہیں سابق امریکی وزیر خارجہ ہنری کسنجر نے نشان عبرت بنانے کا کہا تھا۔
نجی ٹی وی کے مطابق سابق وزیر خارجہ بلاول بھٹو نے ذوالفقار علی بھٹو صدارتی ریفرنس کی سماعت کے بعد پریس کانفرنس سے خطاب کرتے ہوئے کہا کہ یہ کیس عدالت کیلئے امتحان ہے، چیف جسٹس پاکستان اور دیگر ججز کے شکر گزار ہیں، عدالت کو اپنے ہاتھوں سے یہ خون دھونا ہے، ذوالفقار علی بھٹو کیس کا فیصلہ کبھی عدالتی نظیر کیلئے استعمال نہیں ہوا۔ ہمارے شہدا واپس نہیں آ سکتے مگر انصاف تو مل سکتا ہے۔
انہوں نے کہا کہ آج 12 سال بعد اس کیس کیس سماعت ہوئی ہے، ہم نے 2018 میں درخواست کی تھی کہ یہ کیس فوری سنا اور فیصلہ دیا جائے۔ امید کرتے ہیں عدلیہ نے فیصلہ کر لیا ہے کہ تاریخ کو درست کرنا ہے۔ شہید ذوالفقار علی بھٹو نے اپنے اصولوں پر سمجھوتہ نہیں کیا، انہوں نے مسلم امہ کو اکٹھا کیا۔ آج بھی ایسی قوتیں موجود ہیں جو چاہتی ہیں کہ عوام کو تاریخی ناانصافی پر انصاف نہ ملے۔
بلاول کا مزید کہنا تھا کہ ہم نے اس کیس کو آگے لے کر چلنا ہے، قائد عوام ذوالفقار علی بھٹو کیلئے انصاف چاہئے، عوام کو معلوم ہے کہ سابق امریکی وزیر خارجہ ہنری کسنجر نے انہیں نشان عبرت بنانے کی بات کی تھی۔