چین میں زلزلہ، وزیر اعظم و سیاسی شخصیات کا اظہارِ افسوس
اسلام آباد (قدرت روزنامہ)نگران وزیر اعظم انوارالحق کاکڑ سمیت دیگر سیاستدانوں نے چین میں آنے والے تباہ کن زلزلے پر اظہار افسوس کیا ہے۔سماجی رابطے کی ویب سائٹ ایکس پر پیغام جاری کرتے ہوئے نگران وزیر اعظم انوارالحق کاکڑ نے رنج و غم کا اظہار کیا۔
انہوں نے لکھا کہ چین کے صوبہ گانسو میں آنے والے زلزلہ کے نتیجے میں قیمتی جانوں کے ضَیاع کے بارے میں جان کر بہت دکھ ہوا۔
Deeply saddened to learn about the loss of precious lives due to the earthquake in Gansu province in China. Our sympathies are with our Chinese brothers and sisters in this hour of grief.
— Anwaar ul Haq Kakar (@anwaar_kakar) December 19, 2023
انہوں نے اظہار یکجہتی کرتے ہوئے مزید لکھا کہ مشکل کی اس گھڑی میں ہماری ہمدردیاں چینی بہنوں اور بھائیوں کے ساتھ ہیں۔چیئرمین پیپلز پارٹی بلاول بھٹو زرداری نے چینی حکومت و عوام سے زلزلے پر اظہارِ افسوس کرتے ہوئے کہا ہے کہ انسانی جانوں کے نقصان پر چین کی حکومت اور عوام سے اظہارِ ہمدردی کرتے ہیں۔
انہوں نے کہا کہ افسوس ناک لمحوں میں پاکستانی عوام اپنےعظیم دوست چین کے ساتھ ہیں اور زخمیوں کی جلد صحتیابی کے لیے دعا گو ہیں۔سابق صدر آصف علی زرداری نے چین میں شدید زلزلے کے باعث ہونے والے نقصان پر دکھ کا اظہار کیا اور کہا کہ دکھ کے ان لمحات میں پاکستان کے عوام چین کی حکومت اور عوام کے ساتھ ہیں۔
انہوں نے زلزلے میں زخمی ہونے والے افراد کی صحت یابی کے لیے دعا بھی کی۔دوسری جانب سینیٹر شیری رحمٰن نے بھی سوشل میڈیا پر پیغام جاری کرتے ہوئے اس سانحہ پر اظہار افسوس کرتے ہوئے چینی عوام سے اظہار یکجہتی کیا۔انہوں نے لکھا کہ شمال مغربی چین کے گانسو اور چنگھائی صوبوں میں زلزلے کی وجہ سے 100 سے زائد افراد جاں بحق ہونے کا سن کر دلی افسوس ہوا ہے۔
My heartfelt condolences to the people affected by the devastating earthquake in northwestern China’s Gansu and Qinghai provinces. Our thoughts and prayers are with the families of the victims, and all of us hope for a swift recovery for the injured. Our sincere condolences also…
— SenatorSherryRehman (@sherryrehman) December 19, 2023
انہوں نے کہا کہ پورا پاکستان متاثرہ لوگوں اور چین کی حکومت کے ساتھ تعزیت اور یکجہتی کا اظہار کرتا ہے۔ ہماری دعائیں متاثرین کے اہل خانہ کے ساتھ ہیں اور ہم زخمیوں کی جلد صحت یابی کی دعا کرتے ہیں۔ان کا مزید کہنا ہے کہ ماضی میں زلزلوں کی تباہی کا مشاہدہ کرنے کے بعد ہم اس مشکل وقت میں متاثرین کا دکھ اور درپیش چیلنجز کو سمجھ سکتے ہیں۔
واضح رہے کہ چین کے دو شمال مغربی صوبوں میں تباہ کن زلزلے سے کم سے کم 111 افراد ہلاک اور 230 سے زائد زخمی ہوگئے ہیں۔
حکام کے مطابق رات گئے آئے زلزلے کی شدت 6.2 ریکارڈ کی گئی تھی جو کہ گانسو اور چنگھائی صوبوں میں آیا۔ زلزلے کی گہرائی 35 کلومیٹر اور اس کا مرکز گانسو کے صوبائی دارالحکومت شہر لانژو سے 102 کلومیٹر جنوبی مغرب میں تھا۔