این اے 151: شاہ محمود اور ان کے بیٹے، بیٹی کے کاغذات نامزدگی مسترد

اسلام آباد (قدرت روزنامہ)پاکستان تحریک انصاف ( پی ٹی آئی) کے وائس چیئرمین شاہ محمود قریشی کے کاغذات نامزدگی قومی اسمبلی کے حلقہ این اے 151 ملتان سے مسترد کردیے گئے . ریٹرننگ آفیسر (آر او) نے این اے 151 ملتان سے شاہ محمود قریشی کے صاحبزادے زین قریشی اور بیٹی مہر بانو کے کاغذات نامزدگی بھی مسترد کردیے ہیں .

آر او نے پنجاب اسمبلی کے حلقہ پی پی 218 سے بھی شاہ محمود قریشی کے کاغذات نامزدگی مسترد کیے ہیں . ادھر این اے 214 تھرپار کر سے بھی شاہ محمود قریشی اور اُن کے بیٹے زین قریشی کے کاغذات نامزدگی مسترد کیے گئے ہیں .
کاغذات نامزدگی منظور یا مسترد کیے جانے کے خلاف اپیل 3 جنوری تک کی جا سکے گی . اپیلوں پر انتخابی ٹریبونل 10 جنوری تک فیصلہ کریں گے، امیدوار اپنے کاغذات 12 جنوری تک واپس لے سکیں گے .
امیدواروں کو انتخابی نشان 13 جنوری کو دیے جائیں گے، عام انتخابات 8 فروری کو ہوں گے . واضح رہے کہ الیکشن کمیشن کے مطابق ملک بھر میں 28 ہزار 626 کاغذاتِ نامزدگی جمع کرائے گئے تھے .