دانیال عزیز پی ٹی آئی کا ٹکٹ چاہتے تھے، گھاس نہ ڈالنے پر آخری روز ٹکٹ لینے آگئے: احسن اقبال

شکر گڑھ(قدرت روزنامہ) مسلم لیگ ن کے سینئر رہنما اور سابق وفاقی وزیر احسن اقبال نے کہا کہ دانیال عزیز پی ٹی آئی کی ٹکٹ کی دوڑ میں تھے، گھاس نہ ڈالنے پر آخری روز ٹکٹ لینے پہنچ گئے .
مسلم لیگ ن کے رہنما اور سابق وفاقی وزیر احسن اقبال نے حلقہ این اے 75 میں الیکشن ہال کے افتتاح پر خطاب کرتے ہوئے کہا کہ 2013ء میں ن لیگی قیادت دانیال عزیز کو ٹکٹ دینے کے حق میں نہیں تھی، میں نے دانیال عزیز کے لئے 20 منٹ کے دلائل دیئے اور وفاداری کی گارنٹی بھی دی .

احسن اقبال نے کہا کہ دانیال عزیز کو حادثے کے بعد ڈی ایچ کیو میں سارے ڈاکٹروں کو سٹینڈ بائی کیا، مجھے سابق جنرل باجوہ نے کہا کہ اگر نارووال میں فرسٹ ایڈ نہ ملتی تو زندگی خطرے میں تھی، دانیال عزیز نے ن لیگ پر مہنگائی کا الزام لگایا اور مجھے ذمہ دار قرار دیا، مہنگائی تو پی ٹی آئی کے آئی ایم ایف پروگرام کی وجہ سے ہوئی تھی .
سابق وفاقی وزیر نے کہا کہ دانیال عزیز نے پی ٹی آئی کو خوش کرنے کے لئے ہمارے خلاف پریس کانفرنس کر ڈالی، پی ٹی آئی کے چکر میں ٹکٹ کے لئے درخواست تک نہ دی تھی .