بلوچستان میں الیکشن کے دن کی تیاریوں سے متعلق اجلاس

کوئٹہ (قدرت روزنامہ)نگراں وزیراعلیٰ بلوچستان علی مردان ڈومکی کی زیرِ صدارت عام انتخابات کے پُرامن انعقاد سے متعلق اجلاس ہوا ہے۔اجلاس میں انتظامی سیکریٹریز، کمشنرز، ڈپٹی کمشنرز اور پوليس حکام نے شرکت کی۔
اس موقع پر اجلاس کے شرکاء کو بریفنگ دی گئی کہ حساس اور انتہائی حساس پولنگ اسٹیشنوں پر 8 ہزار سی سی ٹی وی کیمرے نصب ہوں گے۔بریفنگ میں بتایا گیا کہ زیارت اور سرد علاقوں میں برفباری کی صورت میں بھاری مشینری متعلقہ ڈسٹرکٹس میں موجود ہوگی۔
اجلاس میں الیکشن کے لیے ریٹائرڈ سیکیورٹی اہلکاروں کی خدمات بھی حاصل کرنے کا فیصلہ کیا گیا۔نگراں وزیراعلیٰ بلوچستان علی مردان ڈومکی کا کہنا تھا کہ الیکشن سے متعلق اب تک کیے گئے اقدامات اطمینان بخش ہیں۔
انہوں نے کہا کہ الیکشن سے متعلق امیدواروں اور عوام کےتحفظات کا فوری ازالہ کیا جائے، عوام کو حق رائے دہی کے استعمال کے لیے سازگار ماحول دیا جائے۔